ന്യൂഡൽഹി: ആർട്ടിക്കിൾ 370 പുന:സ്ഥാപിക്കാനാകില്ലെന്ന മുൻ നേതാവ് ഗുലാം നബി ആസാദിന്റെ പ്രസ്താവനയ്ക്കെതിരെ രൂക്ഷവിമർശനവുമായി കോൺഗ്രസ്. പാർട്ടി വിട്ടതോടെയാണ് കോൺഗ്രസ് നിലപാട് മാറ്റിയതെന്നും, ഗുലാം നബി ആസാദിന്റെ കള്ളത്തരം തുറന്ന് കാട്ടണമെന്നും കോൺഗ്രസ് പറഞ്ഞു.
പാർലമെന്റിൽ മൂന്നിൽ രണ്ട് ഭൂരിപക്ഷമുള്ള സർക്കാരിന് മാത്രമേ ആർട്ടിക്കിൾ 370 പുനഃസ്ഥാപിക്കാൻ കഴിയൂ എന്നും, മറിച്ചുള്ള വാഗ്ദാനങ്ങൾ ജനങ്ങളെ തെറ്റിദ്ധരിപ്പിക്കുന്നതിന് വേണ്ടിയാണെന്നുമാണ് ഗുലാം നബി ആസാദ് കഴിഞ്ഞ ദിവസം പറഞ്ഞത്. ആർ്ട്ടിക്കിൾ 370 റദ്ദാക്കിയതിനെതിരെ പാർലമെന്റിൽ അദ്ദേഹം സംസാരിച്ചിട്ടുണ്ടെന്നും, ഇപ്പോഴത്തെ നിലപാടുമാറ്റത്തിലെ കള്ളത്തരങ്ങൾ തുറന്നു കാട്ടണമെന്നും കോൺഗ്രസ് ജനറൽ സെക്രട്ടറി ജയറാം രമേശ് പറഞ്ഞു.
ആർട്ടിക്കിൾ 370 റദ്ദാക്കിയതിനെതിരെ 2019ൽ കോൺഗ്രസ് വർക്കിംഗ് കമ്മിറ്റി പ്രമേയം പാസാക്കിയിരുന്നു. ഇതിനേയും ഗുലാം നബി ആസാദ് വിമർശിച്ചിരുന്നു. എന്നാൽ അന്നത്തെ പ്രമേയത്തിൽ ഗുലാം നബി ആസാദും ഒപ്പു വച്ചിരുന്നതായി ജയറാം രമേശ് ചൂണ്ടിക്കാട്ടി.
