പുതുച്ചേരി: 100കളിൽ നിന്ന് ഒറ്റ മാസം കൊണ്ട് ലക്ഷങ്ങളിലേക്ക് കറന്റ് ബിൽ കൂടിയത് കണ്ട് അമ്പരന്ന് ഗൃഹനാഥൻ. തൊട്ടു മുൻപുള്ള മാസം വരെ വളരെ ചെറിയ തുക ബിൽ കിട്ടിയിരുന്നതിന്റെ സ്ഥാനത്ത് ഇക്കുറി കിട്ടിയത് 12.91 ലക്ഷം രൂപയുടെ ബിൽ. പുതുച്ചേരി വിശ്വനാഥൻ നഗറിലെ സെക്കിജാർ സ്ട്രീറ്റിൽ താമസിക്കുന്ന ശരവണനാണ് ലക്ഷങ്ങളുടെ കറന്റ് ബിൽ കണ്ട് ഞെട്ടിയത്. 12,91,845 രൂപയാണ് ഒരു മാസത്തെ ബില്ലായി കിട്ടിയത്.
ടിവി മെക്കാനിക്കായി ജോലി ചെയ്യുകയാണ് ശരവണൻ. ജൂലൈ മാസത്തെ ബില്ലിലാണ് കുത്തനെയുള്ള കയറ്റം ഉണ്ടായത്. ജൂൺ മാസത്തെ റീഡിംഗ് 20,630 ആയിരുന്നു. ജൂലൈ മാസത്തെ ബില്ലിൽ 2,11,150 ആണ് റീഡിംഗ് രേഖപ്പെടുത്തിയത്. അതായത് 1,90,520 യൂണിറ്റ് അധികം. വാടക വീട്ടിലാണ് ശരവണന്റെ താമസം. 600 രൂപയാണ് വീടിന്റെ വാടക. അവിടെയാണ് 12 ലക്ഷത്തിന്റെ ബിൽ എത്തിയത്.
ബിൽ കണ്ട് താൻ ഞെട്ടിപ്പോയെന്നാണ് ശരവണൻ പറയുന്നത്. പ്രശ്നം ഉടനെ തന്നെ ഇലക്ട്രിസിറ്റി ഓഫീസിൽ അറിയിച്ചു. അഞ്ച് അക്കങ്ങൾക്ക് പകരം ആറ് അക്കം റീഡിംഗ് വന്നതാണ് പ്രശ്നമായത്. അത് എങ്ങനെ സംഭവിച്ചുവെന്ന് ദൈവത്തിന് മാത്രം അറിയാമെന്നും ശരവണൻ പറയുന്നു. എന്നാൽ ഇത് സാങ്കേതിക തകരാണെന്നും പ്രശ്നം ശ്രദ്ധയിൽ പെട്ട ഉടനെ തന്നെ പരിഹരിച്ചെന്നുമാണ് അധികൃതരുടെ വാദം.
