സവർക്കറെ കുറിച്ച് എന്നെ പഠിപ്പിച്ചത് രാഹുൽ ഗാന്ധിയുടെ അമ്മൂമ്മ; എപി അബ്ദുള്ളക്കുട്ടി

തിരുവനന്തപുരം : വീർ സവർക്കറെക്കുറിച്ച് തന്നെ പഠിപ്പിച്ചത് രാഹുൽ ഗാന്ധിയുടെ അമ്മയാണെന്ന് ബിജെപി നേതാവ് എപി അബ്ദുള്ളക്കുട്ടി. രാഹുൽ ഗാന്ധി ആ പ്രസംഗങ്ങൾ കേൾക്കാൻ തയ്യാറാകണമെന്നും അദ്ദേഹം പറഞ്ഞു. ഭാരത് ജോഡോ യാത്രയിലെ സവർക്കർ വിവാദത്തിൽ പ്രതികരിക്കുകയായിരുന്നു അദ്ദേഹം. ഭാരത് ജോഡോ യാത്രയുടെ ഭാഗമായി സ്ഥാപിച്ച ഫ്‌ളക്‌സ് ബോർഡിൽ സവർക്കറുടെ ചിത്രം ഉൾപ്പെടുത്തിയിരുന്നു. സംഭവം വിവാദമായതോടെ ഈ ചിത്രം മാത്രം നീക്കുകയും മണ്ഡലം പ്രസിഡന്റിനെ സസ്‌പെൻഡ് ചെയ്യുകയും ചെയ്തിരുന്നു.

പോപ്പുലർ ഫ്രണ്ട് പ്രവർത്തകർ ദേശ ദ്രോഹ, മനുഷ്യ ദ്രോഹ പ്രസ്താവനകളാണ് നടത്തുന്നത് എന്നും അബ്ദുളളക്കുട്ടി ആരോപിച്ചു. കോഴിക്കോട് കടപ്പുറത്ത് നടത്തിയ പ്രസംഗത്തിനെതിരെയായിരുന്നു വിമർശനം.

ഖുർആനെ വക്രീകരിച്ചുകൊണ്ടുള്ള പ്രസംഗമാണ് പോപ്പുലർ ഫ്രണ്ടുകാർ കടപ്പുറത്ത് നടത്തിയത്. ഇത് ഖുർആൻ നിന്ദ മാത്രമല്ല ഭരണഘടനാ നിന്ദ കൂടിയാണ്. ഇത്തരം ദേശദ്രോഹ പ്രസ്താവനകളെ പ്രോത്സാഹിപ്പിക്കരുത്. പിണറായി വിജയനും എൽഡിഎഫും യുഡിഎഫും ഭീകരവാദ പ്രവർത്തനത്തെ കൈയ്യും കെട്ടി നോക്കി നിൽക്കുകയാണെന്നും അദ്ദേഹം പറഞ്ഞു.

പോപ്പുലർ ഫ്രണ്ട് കേന്ദ്രങ്ങളിൽ നടക്കുന്ന പരിശോധനകൾക്ക് മറുപടിയായി ”നിയമം നിയമത്തിന്റെ വഴിക്ക് പോട്ടെ” എന്നാണ് അദ്ദേഹം പറഞ്ഞത്.