‘നന്ദി വിരാട് കോഹ്ലി‘: ഇന്ത്യൻ ബാറ്റർ വിരാട് കോഹ്ലിക്ക് നന്ദി അറിയിച്ച് വിരമിച്ച ടെന്നീസ് ഇതിഹാസം റോജർ ഫെഡറർ- Roger Federer thanks Virat Kohli

ന്യൂഡൽഹി: ടെന്നീസിൽ നിന്നും വിരമിച്ച ഇതിഹാസ താരം റോജർ ഫെഡറർക്ക് ആശംസകൾ അറിയിച്ച് ഇന്ത്യൻ ക്രിക്കറ്റ് താരം വിരാട് കോഹ്ലി. എടിപിയുടെ സാമൂഹിക മാദ്ധ്യമ പേജിലൂടെ, റിക്കോർഡ് ചെയ്ത വീഡിയോ സന്ദേശമായാണ് കോഹ്ലി ഫെഡറർക്ക് ആശംസകൾ അറിയിച്ചത്. കോഹ്ലിയുടെ ആശംസകൾക്ക് ഫെഡറർ നന്ദി പറഞ്ഞു.

‘ഹലോ റോജർ. ഇങ്ങനെ ഒരു സന്ദേശം താങ്കൾക്ക് അയയ്‌ക്കാൻ കഴിയുന്നത് അഭിമാനകരമാണ്. മനോഹരമായ ധാരാളം ഓർമ്മകളും നിമിഷങ്ങളും സമ്മാനിച്ച ഐതിഹാസികമായ കരിയറാണ് താങ്കളുടേത്. 2018 ഓസ്ട്രേലിയൻ ഓപ്പണിനിടെ താങ്കളെ നേരിട്ട് കാണാനുള്ള അവസരം എനിക്ക് ലഭിച്ചിരുന്നു. ജീവിതത്തിൽ ഒരിക്കലും മറക്കാനാകാത്ത അനുഭവമായിരുന്നു അത്. ടെന്നീസ് ലോകത്തുള്ളവർ മാത്രമല്ല, അതിന് പുറത്തുള്ള ധാരാളം ആളുകളും താങ്കളെ ആരാധിക്കുന്നവരാണ്. ലോകത്തിൽ അപൂർവ്വം കായിക താരങ്ങൾക്ക് മാത്രം സിദ്ധിക്കുന്ന ഭാഗ്യമാണത്.‘ കോഹ്ലി പറഞ്ഞു.

‘കളിക്കളത്തിലായിരിക്കുമ്പോൾ കേളീമികവിന്റെയും അനുപമമായ വ്യക്തിത്വത്തിന്റെയും പ്രഭാവലയമാണ് ഞങ്ങൾക്ക് താങ്കളിൽ കാണാൻ സാധിച്ചത്. എക്കാലത്തെയും പ്രിയപ്പെട്ട കായിക താരമായാണ് ഞാൻ താങ്കളെ കാണുന്നത്. താങ്കളുടെ ജീവിതത്തിന്റെ അടുത്ത ഘട്ടവും ആസ്വാദ്യകരവും വിജയകരവുമായിരിക്കാൻ എല്ലാവിധ ആശംസകളും നേരുന്നു. ഇതായിരുന്നു വിരാട് കോഹ്ലിയുടെ സന്ദേശം.

Thank you for all the incredible memories, Roger 💫 @rogerfederer | #RForever | @imVkohli pic.twitter.com/VjPtVp9aq6

— ATP Tour (@atptour) September 29, 2022

കോഹ്ലിയുടെ സന്ദേശത്തിന് റോജർ ഫെഡറർ നന്ദി അറിയിച്ചു. നന്ദി വിരാട് കോഹ്ലി, വൈകാതെ തമ്മിൽ കാണാമെന്ന് കരുതുന്നു. ഇതായിരുന്നു ഫെഡററുടെ മറുപടി.