അടുക്കളയിൽ എപ്പോഴും ആവശ്യമുളള ഒരു സാധനമാണ് പ്രഷർ കുക്കർ. മർദ്ദം ഉപയോഗിച്ചാണ് ഇത് പ്രവർത്തിക്കുന്നത്. അതുകൊണ്ട് തന്നെ കുക്കറിൽ ഭക്ഷണം പെട്ടെന്ന് പാകം ചെയ്യാനും അത് എളുപ്പത്തിൽ കൈകാര്യം ചെയ്യാനും നമുക്കാകും. എന്നാൽ ഒരു ചെറിയ കൈയ്യബദ്ധം മതി പ്രഷർ കുക്കർ പൊട്ടിത്തെറിക്കാനും.
പ്രഷർ കുക്കർ അപകടങ്ങൾ പലയിടത്തും ഉണ്ടാകാറുണ്ട്. അങ്ങനെ മരണങ്ങളും സംഭവിച്ചിട്ടുണ്ട്. എന്നാൽ എന്തുകൊണ്ടാണ് ഇത് പൊട്ടിത്തെറിക്കുന്നത് എന്ന് ചിന്തിച്ചിട്ടുണ്ടോ?
പ്രഷർ കുക്കറിന്റെ വാൽവിന് തകരാറ് ഉണ്ടാകുമ്പോഴാണ് അത് അപകടത്തിന് വഴിവെയ്ക്കുന്നത്. വാൽവിനകത്ത് എന്തെങ്കിലും വസ്തുക്കൾ കുടുങ്ങി കിടക്കുമ്പോഴും ഇത് സംഭവിക്കും. കുക്കറിൽ സാധനങ്ങൾ കുത്തിനിറയ്ക്കുന്നതും പൊട്ടിത്തെറിക്ക് കാരണമാകാറുണ്ട്. ഉപയോഗിക്കാൻ എടുക്കുമ്പോഴെല്ലാം സേഫ്റ്റി വാൽവിന് തകരാറുണ്ടോ എന്ന് പരിശോധിക്കണം. എന്തെങ്കിലും സംശയം തോന്നിയാൽ അത് ഉടനടി മാറ്റണം. ഏത് കമ്പനിയുടെ കുക്കറാണോ, അതേ കമ്പനിയുടെ സേഫ്റ്റി വാൾവ് വേണം ഉപയോഗിക്കാൻ.
അടുത്തത് ശ്രദ്ധിക്കേണ്ടത് കുക്കറിന്റെ ഗാസ്കറ്റിൽ വിളളൽ വന്നിട്ടുണ്ടോ എന്നാണ്. കുക്കറിന്റെ ഉപയോഗം അനുസരിച്ച് ചില ഗാസ്കറ്റുകൾ വർഷം തോറും മാറ്റണമെന്ന് കമ്പനികൾ ആവശ്യപ്പെടാറുണ്ട്. ഗാസ്ക്കറ്റ് ലൂസാകുകയോ മറ്റോ ചെയ്താലും അത് തക്കസമയത്ത് മാറ്റാൻ മടിക്കരുത്.
ഗുണനിലനാരം ഇല്ലാത്ത കുക്കറുകൾ ഒഴിവാക്കി, ഐഎസ്ഐ മുദ്രയുള്ള കമ്പനികളുടേത് മാത്രം വാങ്ങുക. കുക്കറിന് അമിതഭാരം നൽകാൻ പാടില്ല. ഇത് പൊട്ടിത്തെറിക്കാനുള്ള സാധ്യത കൂട്ടുകയും അതോടൊപ്പം ഭക്ഷണത്തിന്റെ രുചിയിൽ വ്യത്യാസം വരുത്തുകയും ചെയ്യും. ഭക്ഷണം വേവാൻ ആവശ്യമുളള വെള്ളം അതിനകത്ത് ഉണ്ടായിരിക്കണം.
പതഞ്ഞ് പൊങ്ങുന്ന ആഹാരം പാകം ചെയ്യുമ്പോൾ കൂടുതൽശ്രദ്ധ ചെലുത്തണം. പതഞ്ഞ് പൊങ്ങുന്നത് വഴി, കുക്കറിൽ നിന്ന് ആവി പോകുന്ന വാൾവ് അടയാൻ സാധ്യതയുണ്ട്. അങ്ങനെയെങ്കിൽ കുക്കറിനകത്ത് മർദ്ദം വർദ്ധിച്ച് ഇത് അടഞ്ഞുപോയേക്കും. അതിനാൽ ഇത്തരം ഭക്ഷണങ്ങൾ പാകം ചെയ്യുമ്പോൾ കൂടുതൽ ശ്രദ്ധ വേണം.
കുക്കറിലെ പ്രഷർ പെട്ടെന്ന് റിലീസ് ചെയ്ത് വിടാൻ ശ്രമിക്കുന്നവരാണ് മിക്ക ആളുകളും. അതിനായി സുരക്ഷിതമല്ലാത്ത പല മാർഗങ്ങളും പലരും സ്വീകരിക്കാറുമുണ്ട്. എന്നാലിത് അപകടത്തിൽ കലാശിക്കുമെന്ന് തിരിച്ചറിയുക. സ്റ്റൗവിൽ നിന്ന് കുക്കർ താഴെയിറക്കി വെച്ച് തനിയെ പ്രഷർ പോകാൻ അനുവദിക്കുന്നതാണ് ഒരു രീതി. കുക്കറിന്റെ മൂടിക്ക് മുകളിലൂടെ തണുത്ത വെള്ളം ഒഴിച്ചും പ്രഷർ സുരക്ഷിതമായി റിലീസ് ചെയ്യാവുന്നതാണ്. മൂടി തുറക്കുന്നതിന് മുൻപ് അകത്തുള്ള പ്രഷർ പൂർണമായും പോയോ എന്നും പരിശോധിക്കണം.
ഉപയോഗിത്തിന് മുൻപും ശേഷവും കുക്കർ നന്നായി കഴുകാൻ പ്രത്യേകം ശ്രദ്ധിക്കണം. ഗാസ്കറ്റും വാൽവും നീക്കിവേണം ഇത് കഴുകാൻ. ഗാസ്കറ്റ് കഴുകി ഉണങ്ങിയതിനുശേഷം മാത്രം മൂടിയിലേക്ക് തിരികെ വെക്കുക. വാൽവ് ടൂത്ത് പിക്കോ മറ്റോ ഉപയോഗിച്ച് വൃത്തിയാക്കുകയും പ്രധാനമാണ്.
Comments