ടെലിവിഷനിലൂടെ ചുവട് വച്ച് സനിമയിലൂടെ ആരാധകരുടെ പ്രിയ താരമായി മാറിയ വ്യക്തിയാണ് ആശ ശരത്. പൊതുവേ ശക്തമായ കഥാപാത്രങ്ങളാണ് താരം തിരഞ്ഞെടുക്കാറുള്ളത്. അതുകൊണ്ട് തന്നെ ആരാധകർക്കിടയിൽ ഈ കഥാപാത്രങ്ങൾക്ക് വലിയ സ്വീകാര്യതയും ലഭിക്കാറുണ്ട്. ഇപ്പോഴിതാ നടിക്ക് പുറമെ മകളും അഭിനയ ജീവിതത്തിലേക്ക് ചുവട് വച്ചിരിക്കുകയാണ്. മകൾ ഉത്തര ശരത്താണ് പുതിയ ചിത്രമായ ഖെദ്ദയിലൂടെ ആശ ശരത്തിനൊപ്പം പ്രേക്ഷകരുടെ മുന്നിൽ എത്തുന്നത്.
ഇപ്പോഴിതാ ഖെദ്ധയുടെ ടീസർ അണിയറപ്രവർത്തകർ പുറത്തുവിട്ടു. ടീസർ പുറത്തിറങ്ങിയതിന് പിന്നാലെ ഉത്തരയ്‌ക്ക് ആശംസയുമായി അമ്മയുടെ ആരാധകർ തന്നെ രംഗത്തെത്തിയിട്ടുണ്ട്. അമ്മ മകൾ ബന്ധങ്ങളിൽ സംഭവിക്കുന്ന വൈകാരിക മുഹൂർത്തങ്ങളും അവിചാരിതമായി കുടുംബ ബന്ധങ്ങളിൽ ഉണ്ടാകുന്ന വെല്ലുവിളികളുമാണ് ചിത്രത്തിന്റെ പ്രമേയം.
ബെൻസി പ്രൊഡക്ഷൻസിന്റെ ബാനറിൽ കെവി അബ്ദൽ നാസർ നിർമ്മിച്ച ചിത്രത്തിന്റെ രചനയും സംവിധാനവും നിർവ്വഹിച്ചത് മനോജ് കാനയാണ്. നവംബർ അവസാനത്തോടു കൂടി ചിത്രം പുറത്തിറങ്ങും.
ഒരു ആർട്ടിസ്റ്റ് ആകണമെന്നതാണ് തന്റെ സ്വപ്‌നം. അഭിനേത്രി, ഡാൻസർ, മോഡൽ, ഇതൊക്കെയായി മുന്നോട്ട് പോകുകയെന്നതാണ് പാഷൻ. വളരെ ഗൗരവത്തോടെയാണ് അതിനെ സമീപിക്കുന്നതെന്നും ഉത്തര മുമ്പ് പറഞ്ഞിരുന്നു. ഇതിന് പുറമെ ആശാ ശരത്തിന്റെ ദൃശ്യത്തിലെ ഐജി വേഷം ഏറെ ശ്രദ്ധിക്കപ്പെട്ടിരുന്നു. വളരെ മികച്ച രീതിയിലായിരുന്നു ഗീത എന്ന കഥാപാത്രത്തെ താരം അവതരിപ്പിച്ചത്.അതിനാൽ തന്നെ ദൃശ്യം തമിഴിലും ആശ തന്നെയാണ് ഈ കഥപാത്രത്തെ അവതരിപ്പിച്ചത്. ഫൈഡോ , കർമ്മയോദ്ധ, ബഡ്ഡ, സക്കറിയയുടെ ഗർഭിണികൾ, വർഷം തുടങ്ങി നിരവധി ചിത്രങ്ങളിൽ താരം ഇതിനോടകം അഭിനയിച്ചിട്ടുണ്ട്.
