സവർക്കർ ബ്രിട്ടീഷുകാരിൽ നിന്ന് പണം വാങ്ങി; ആർഎസ്എസുകാർ സ്വാതന്ത്ര്യ സമരത്തിൽ പങ്കെടുത്തില്ല; വിവാദ പ്രസ്താവനയുമായി രാഹുൽ ഗാന്ധി; പോസ്റ്ററിൽ കരിവാരിത്തേച്ച് പ്രതിഷേധവുമായി നാട്ടുകാർ

ന്യൂഡൽഹി : സ്വാതന്ത്ര്യസമര സേനാനിയായ വിജയ് ദാമോദർ സവർക്കർക്കെതിരെ വിവാദ പ്രസ്താവന നടത്തിയതിന് പിന്നാലെ കോൺഗ്രസ് നേതാവ് രാഹുൽ ഗാന്ധിയ്‌ക്ക് നേരെ വ്യാപക പ്രതിഷേധവുമായി നാട്ടുകാർ രംഗത്ത്. രാഹുൽ ഗാന്ധിയുടെ പോസ്റ്ററിൽ കരിയോയിൽ തേച്ചാണ് പ്രതിഷേധം. സ്വാതന്ത്ര്യസമര സേനാനികളെ അപമാനിക്കുന്ന തരത്തിലുള്ള പ്രസ്താവന നടത്തിയ രാഹുൽ ക്ഷമ ചോദിക്കണമെന്നും ബിജെപി ആവശ്യപ്പെട്ടു. മുംബൈയിലാണ് ബിജെപിയുടെ നേതൃത്വത്തിലാണ് പ്രതിഷേധ പരിപാടികൾ നടന്നത്.

സ്വാതന്ത്ര്യസമരത്തിൽ ആർഎസ്എസുകാർക്ക് പങ്കില്ലെന്നാണ് രാഹുൽ പറഞ്ഞത്. ആർഎസ്എസുകാർ ബ്രിട്ടീഷുകാരെ സഹായിക്കുകയായിരുന്നു. ഇത്തരം സഹായങ്ങൾ ചെയ്തതിന് സവർക്കർക്ക് ബ്രിട്ടീഷുകാർ സ്റ്റൈപ്പന്റ് നൽകിയിരുന്നു. കോൺഗ്രസ് നേതാക്കൾ മാത്രമാണ് ബ്രിട്ടീഷുകാർക്കെതിരെ പോരാടിയത് എന്നും കോൺഗ്രസ് എംപി ആരോപിച്ചിരുന്നു.

ഇതിനെതിരെയാണ് നേതാക്കൾ രംഗത്തെത്തിയിരിക്കുന്നത്. രാഹുൽ ഗാന്ധി നടത്തിയ അപകീർത്തികരമായ പ്രസ്താവനകൾ അപലപനീയമാണെന്ന് ബിജെപി ആരോപിച്ചു. ഇത്തരം പ്രചാരണങ്ങൾ ഒരിക്കലും അനുവദിച്ചുകൂടാ. രാഹുൽ ഗാന്ധി മാപ്പ് ചോദിക്കണമെന്നും പ്രവർത്തകർ ആവശ്യപ്പെട്ടു. പ്രതിഷേധത്തിനിടെ ഇവർ രാഹുലിന്റെ പോസ്റ്ററിൽ കരിയോയിൽ തേച്ചു.

എന്തുകൊണ്ടാണ് ഉദ്ധവ് താക്കറെ ഇപ്പോഴും മൗനം പാലിക്കുന്നത് എന്നും പ്രവർത്തകർ ചോദിച്ചു. ബാലാ സാഹെബ് താക്കറെയുടെ ആശയങ്ങൾ മറന്നാണ് ഇന്ന് ഉദ്ധവ് പ്രവർത്തിക്കുന്നത് എന്നും പ്രവർത്തകർ പറഞ്ഞു.