ചെന്നൈ : പ്രായപൂർത്തിയാകാത്ത സഹപാഠിയെ വിവാഹം ചെയ്ത കോളേജ് വിദ്യാർത്ഥിനി അറസ്റ്റിൽ. ചെന്നൈ മേട്ടൂരിലാണ് സംഭവം. 20 കാരിയായ യുവതിയ്‌ക്കെതിരെയാണ് കേസെടുത്തിരിക്കുന്നത്. യുവതി മൂന്ന് മാസം ഗർഭിണിയാണ്. 17 കാരനെ വിവാഹം ചെയ്തതിന് പോക്‌സോ ആക്ട് പ്രകാരമാണ് കേസെടുത്തത്.
സേലം ഓമല്ലൂർ സ്വദേശിയാണ് ആൺകുട്ടി. ഇരുവരും ഒരേ കോളേജിലാണ് പഠിച്ചിരുന്നത്. ഏപ്രിലിലാണ് ഇരുവരെയും കാണാതായത്. കോളേജിൽ പോയ 17 കാരൻ വീട്ടിൽ തിരിച്ചെത്തിയില്ല. ഇതോടെ മകനെ കാണാനില്ലെന്ന് കുടുംബം പോലീസിൽ പരാതിപ്പെട്ടു. വിശദമായ അന്വേഷണം നടത്തിയെങ്കിലും കുട്ടിയെ കണ്ടെത്താനായില്ല. തുടർന്ന് ആൺകുട്ടിയുടെ കുടുംബം ഹേബിയസ് കോർപസ് ഹർജി നൽകുകയായിരുന്നു.
പോലീസ് നടത്തിയ അന്വേഷണത്തിൽ കൃഷ്ണഗിരിയിൽ നിന്നാണ് ഇരുവരെയും കണ്ടെത്തിയത്. അപ്പോഴേക്കും ഇരുവരുടെയും വിവാഹം കഴിഞ്ഞിരുന്നു. ആറ് മാസം മുൻപ് ഓടിപ്പോയ യുവതി മൂന്ന് മാസം ഗർഭിണിയായിരുന്നു. യുവതിയെ ജൂഡീഷ്യൽ കസ്റ്റഡിയിൽ വിട്ടിരിക്കുകയാണ്.
Comments