ന്യൂഡൽഹി: ഹിന്ദു ഇതിഹാസങ്ങൾ ആളുകളെ ഭീകരവാദത്തിലേക്ക് നയിക്കുന്നുവെന്ന വിവാദ പരാമർശവുമായി കോൺഗ്രസ് നേതാവ്. മുൻ ലോക്സഭാ സ്പീക്കറും, കേന്ദ്രമന്ത്രിയുമായിരുന്ന ശിവരാജ് പട്ടീൽ ആണ് ഹിന്ദു മതവികാരത്തെ വ്രണപ്പെടുത്തുന്ന പരാമർശം നടത്തിയത്. ക്രിസ്ത്യൻ മതവും ഭീകരവാദമാണ് പഠിപ്പിക്കുന്നത് എന്നും ശിവരാജ് പട്ടീൽ പറഞ്ഞു. മുൻ കേന്ദ്രമന്ത്രിയും മുതിർന്ന കോൺഗ്രസ് നേതാവുമായ മോഹ്സിന കിദ്വായുടെ ജീവചരിത്രം പ്രകാശനം ചെയ്ത് സംസാരിക്കുകയായിരുന്നു ശിവരാജ് പട്ടീൽ.
ഖുർആനും ഇസ്ലാം മതവും ആളുകളെ ഭീകരവാദത്തിലേക്ക് നയിക്കുന്നുവെന്നാണ് വ്യാപകമായി ഉയരുന്ന ആരോപണം. ഇതുമായി ബന്ധപ്പെട്ട ചർച്ചകളും സജീവമാണ്. എന്നാൽ മഹാഭാരതവും പഠിപ്പിക്കുന്നത് ഭീകരവാദമാണ്. കുരുക്ഷേത്ര യുദ്ധത്തിൽ കൃഷ്ണൻ ഭീകരവാദമാണ് അർജുനനെ പഠിപ്പിച്ചത്. അതുകൊണ്ട് ഖുർആൻ മാത്രമാണ് തീവ്രവാദം പഠിപ്പിക്കുന്നത് എന്ന് പറയാൻ ആകില്ല. സമാനമായി ക്രിസ്ത്യൻ മതവും ഭീകരവാദവുമായി ബന്ധപ്പെട്ട സന്ദേശങ്ങളാണ് നൽകുന്നത്.
എല്ലാം ആളുകളെ പറഞ്ഞ് മനസ്സിലാക്കിയാലും ചിലർ ആയുധമെടുക്കും. അവരിൽ നിന്നും നമുക്ക് ഓടിമാറാൻ കഴിയില്ല. അവരെ ഭീകരർ എന്ന് വിളിക്കാനോ അവർ ചെയ്യുന്നത് തെറ്റാണെന്ന് പറയാനോ കഴിയില്ലെന്നും ശിവരാജ് പട്ടീൽ വ്യക്തമാക്കി.
അതേസമയം പരാമർശത്തിൽ വലിയ പ്രതിഷേധമാണ് കോൺഗ്രസ് നേതാവിനെതിരെ ഉയരുന്നത്. ഹിന്ദു മതത്തെയും വിശ്വാസങ്ങളെയുമെല്ലാം ശിവരാജ് പട്ടീൽ അപമാനിച്ചതായി ഹിന്ദു സംഘടനകൾ വ്യക്തമാക്കി.
Comments