ഭാരതത്തിന്റെ അഭിമാന ദൗത്യമായ ഗഗൻയാനിലെ സഞ്ചാരികളെ പ്രധാനമന്ത്രി പരിചയപ്പെടുത്തിയപ്പോൾ, മലയാളിയായ പ്രശാന്ത് ബാലകൃഷ്ണൻ നായരും ദൗത്യത്തിന്റെ ഭാഗമാവുന്നുവെന്നത് കേരളക്കരയ്‌ക്കാകെ സന്തോഷം പകർന്നിരുന്നു. എന്നാൽ അതിലേറെ സന്തോഷവും ഞെട്ടലും നൽകിയത് അന്നേ ദിവസം തന്നെ മലയാളികളുടെ ഇഷ്ട നടി ലെന പങ്കുവച്ച പോസ്റ്റായിരുന്നു. പ്രശാന്ത് ബാലകൃഷ്ണൻ തന്റെ ഭർത്താവാണെന്ന വിവരം ആ ശുഭ മുഹൂർത്തത്തിലായിരുന്നു നടി പങ്കുവച്ചത്. ഇപ്പോൾ പ്രശാന്തിന്റെ കരിയറിലെ മറ്റൊരു നേട്ടവും പങ്കുവച്ചിരിക്കുകയാണ് താരം.
ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എയ്‌റോസ്പെയ്സ് എൻജിനീയറിങ്ങിൽ പ്രശാന്ത് ബാലകൃഷ്ണൻ എംടെക് റിസർച്ച് കൊളോക്യം അവതരിപ്പിച്ചുവെന്ന വിവരമാണ് ലെന പുറത്തുവിട്ടിരിക്കുന്നത്. സമൂഹമാദ്ധ്യമങ്ങളിലൂടെ പ്രശാന്ത് കൊളോക്യം അവതരിപ്പിക്കുന്നതിന്റെ വീഡിയോയും താരം പങ്കുവച്ചു. പ്രശാന്തിനെ അഭിനന്ദിച്ചും ഇരുവർക്കും ആശംസകൾ നേർന്നും നിരവധി പേരാണ് രംഗത്തെത്തിയത്.
ഫെബ്രുവരി 27-ാം തീയതി തിരുവനന്തപുരം വിക്രം സാരഭായ് സ്‌പേസ് സെന്ററിൽ നടന്ന ചടങ്ങിലാണ് പ്രധാനമന്ത്രി ഗഗൻയാനിലെ സഞ്ചാരികളെ ഔദ്യോഗികമായി പ്രഖ്യാപിച്ചത്. ഇതിനുപിന്നാലെയായിരുന്നു ഗ്രൂപ്പ് ക്യാപ്റ്റൻ പ്രശാന്ത് ബി നായരുമായുള്ള വിവാഹത്തെ കുറിച്ച് ലെന വെളിപ്പെടുത്തിയത്. ഔദ്യോഗിക പ്രഖ്യാപനത്തിന് മുമ്പ് ഇക്കാര്യം വെളിപ്പെടുത്തിയാൽ പ്രോട്ടോകോളിനെ ബാധിക്കുമെന്നും അതിനാലാണ് രഹസ്യമായി വച്ചതെന്നും ലെന പറഞ്ഞിരുന്നു. ബെംഗളൂരുവിലെ മല്ലേശ്വരം ക്ഷേത്രത്തിൽ വച്ച് നടന്ന വിവാഹത്തിൽ മാതാപിതാക്കളും അടുത്ത ബന്ധുക്കളും മാത്രമാണ് പങ്കെടുത്തത്.
