കോപം എന്നത് പരിധി വിടുന്ന ഒരു വികാരമാണ്. ആളുകൾ കോപാകുലരാകുമ്പോൾ പരിസരം പോലും മറന്ന് പ്രതികരിക്കാറുണ്ട്. കോപം ഒരു സാധാരണ മനുഷ്യ വികാരം തന്നെ. എന്നാൽ, അത് നിയന്ത്രിക്കേണ്ടത് നമ്മുടെ മാനസികവും ശാരീരികവുമായ ആരോഗ്യത്തിന് ആവശ്യമാണ്. കോപം അതിരുവിടുമ്പോൾ, നിയന്ത്രിക്കാൻ കഴിയാതെ വരുമ്പോൾ പല പ്രശ്നങ്ങളിലും നമ്മൾ അകപ്പെടും. ജോലിസ്ഥലത്തെ പ്രശ്‌നങ്ങളും, വ്യക്തിബന്ധങ്ങളിലുണ്ടാകുന്ന പ്രശ്നങ്ങളുമാണ് ഭൂരിപക്ഷം ആൾക്കാരെയും കോപാകുലരാക്കുന്നത്. സ്വയം സൃഷ്ടിക്കാതെ ഒരിക്കലും കോപം സംഭവിക്കില്ല. തന്‍റെ മനസ്സിന്റെയും വികാരങ്ങളുടെയും പ്രവൃത്തികളെ ബോധപൂർവം നിയന്ത്രിക്കുകയാണെങ്കിൽ, കോപം എന്ന അനുഭവം ഉണ്ടാകുകയുമില്ല. അമിത ദേഷ്യം നിയന്ത്രിക്കാൻ എന്താണ് എളുപ്പ വഴികൾ?
- അമിത ദേഷ്യം ശമിപ്പിക്കാൻ ദീർഘ ശ്വാസം എടുക്കുന്നതിലൂടെ സാധിക്കും. ദേഷ്യം വരാൻ പോകുന്നുവെന്ന് തോന്നിയാൽ ഉടൻ തന്നെ കുറച്ച് മാറി നിന്ന് ദീർഘമായി ശ്വാസോച്ഛാസം ചെയ്യുക. ഇത് നിങ്ങളുടെ മനസ്സിനെ തീർച്ചയായും ശാന്തമാകും.
- അമിത ദേഷ്യം വരുമ്പോൾ വായിൽ തോന്നിയതെന്തും നാം വിളിച്ചു പറയും. അത് വളരെ വലിയ പ്രശ്നങ്ങളിലേയ്‌ക്ക് നയിക്കും. അതുകൊണ്ടു തന്നെ ദേഷ്യം വരുമ്പോൾ പ്രത്യാഘാതങ്ങളെ പറ്റി ചിന്തിക്കുക. അനന്തര ഫലങ്ങളെ പറ്റി ചിന്തിക്കുമ്പോൾ നമ്മുടെ ദേഷ്യം ശമിക്കും.
- ദേഷ്യം കുറയ്‌ക്കാനും മനസ്സ് ശാന്തമാക്കാനും ഏറ്റവും നല്ല വഴിയാണ് യോഗയും ധ്യാനവും പരിശീലിക്കുക എന്നത്. നിങ്ങളുടെ ശരീരത്തിന്റെ മനസ്സിന്റെയും പിരിമുറുക്കവും അസ്വസ്ഥതയും അയയ്‌ക്കാൻ യോഗയും ധ്യാനവും ചെയ്യുന്നതിലൂടെ സാധിക്കും.
- ദേഷ്യം വരുമ്പോൾ മറ്റുള്ളവരോട് പറയാൻ കഴിയാത്തത് എഴുതി തീർക്കുക. മനസ്സിൽ തോന്നുന്നത് കുറിച്ചാൽ ദേഷ്യം കുറയും.
- ഒറ്റയ്‌ക്ക് സംസാരിക്കുക എന്നതും കോപം ശമിപ്പിക്കാനുള്ള ഒരു പോംവഴിയാണ്. മാത്രമല്ല, ദേഷ്യം വരുമ്പോൾ അവിടെ നിന്നും എണീറ്റ് പോവുക. ശേഷം കുറച്ച് സമയം ശുദ്ധവായു ശ്വസിച്ച് ഒറ്റയ്‌ക്ക് നടക്കുക. ഇത് നിങ്ങളുടെ ദേഷ്യം നിയന്ത്രിയ്‌ക്കാനും മനസ്സിനെ ശാന്തമാക്കാനും സഹായിക്കും.
