ന്യൂഡൽഹി: യുകെയുടെ ആദ്യ ഇന്ത്യൻ വംശജനായ പ്രധാനമന്ത്രിയായി തിരഞ്ഞെടുക്കപ്പെട്ട ഋഷി സുനകിന് അഭിനന്ദവുമായി ഇൻഫോസിസ് സ്ഥാപക ചെയർമാനും അദ്ദേഹത്തിന്റെ ഭാര്യാപിതാവുമായ എൻആർ നാരായണമൂർത്തി. ബ്രിട്ടണിലെ ജനങ്ങൾക്കായി മികച്ച സേനവം കാഴ്ചവെയ്ക്കാനാണ് അദ്ദേഹം ഋഷി സുനകിന് നൽകുന്ന ഉപദേശം.
സുനകിനെ കുറിച്ചോർത്ത് അഭിമാനമുണ്ടെന്നും രാജ്യത്തിനായി മികച്ച സേവനം കാഴ്ച വെയ്ക്കുമെന്നുള്ള ആത്മവിശ്വാസവുമുണ്ടെന്നാണ് നാരായണമൂർത്തി പറഞ്ഞത്. മുന്നോട്ടുള്ള പ്രവർത്തനങ്ങൾക്ക് വിജയാശാംസയും അദ്ദേഹം നേർന്നു. നാരായണമൂർത്തിയുടെ മകൾ അക്ഷതയാണ് സുനകിന്റെ ഭാര്യ.
പ്രധാനമന്ത്രിയായി തിരഞ്ഞെടുക്കപ്പെട്ട ഋഷി സുനക് ഇന്ന് ചുമതലയേൽക്കും. ചാൾസ് മൂന്നാമൻ രാജാവിനെ സന്ദർശിച്ച് ആചാരപരമായ ചടങ്ങുകൾക്ക് ശേഷമാകും സ്ഥാനമേൽക്കുക. സ്ഥാനമൊഴിയുന്ന ലിസ് ട്രസും രാജാവിനെ സന്ദർശിക്കും. തുടർന്ന് വിടവാങ്ങൽ പ്രസംഗത്തിന് ശേഷം സുനക് അധികാരമേൽക്കും.
ബക്കിങ്ഹാം പാലസിൽ നിന്നും പ്രധാനമന്ത്രിയുടെ ഔദ്യോഗിക വസതിയായ ഡൗണിംഗ് സ്ട്രീറ്റിലെ പത്താം നമ്പർ വസതിയിലെത്തുന്ന സുനക് രാജ്യത്തെ അഭിസംബോധന ചെയ്യും. ഉച്ചയ്ക്ക് ശേഷം ക്യാബിനറ്റ് അംഗങ്ങളെ നിയമിക്കും.
