കൊച്ചി : മഹാരാജാസ് കോളേജിലെ കെഎസ് യു-എസ്എഫ്ഐ സംഘർഷത്തെ തുടർന്ന് പോലീസ് അറസ്റ്റ് ചെയ്ത സഹോദരനെ വിട്ടയയ്ക്കണമെന്ന ആവശ്യവുമായി യുവാവിന്റെ ആത്മഹത്യാ ഭീഷണി. കൊച്ചി തോപ്പുംപടി പാലത്തിന് മുകളിൽ കയറി നിന്നാണ് യുവാവിന്റെ ഭീഷണി. ഫോർട്ട് കൊച്ചി സ്വദേശി കമാലാണ് ആത്മഹത്യാഭീഷണി മുഴക്കിയത്. തുടർന്ന് ഇയാളെ താഴെയിറക്കി.
മഹാരാജ് കോളേജിലെ കെഎസ്യു -എസ്എഫ്ഐ സംഘർഷത്തെ തുടർന്ന് ഇന്നലെയാണ് ഇയാളുടെ സഹോദരൻ മാലിക്കിനെ പോലീസ് അറസ്റ്റ് ചെയ്തത്. ഇയാളെ വിട്ടുകിട്ടണം എന്ന ആവശ്യവുമായാണ് യുവാവ് പാലത്തിന് മുകളിൽ കയറിയത്. കൊച്ചി ഡിസിപിയാണ് മാദ്ധ്യമങ്ങളെ ഇക്കാര്യം അറിയിച്ചത്.
ഇന്നലെ എസ്എഫ്ഐ-കെഎസ്യു വിദ്യാർത്ഥികൾ തമ്മിലുണ്ടായ ഏറ്റുമുട്ടലിൽ 16 പേർക്കാണ് പരിക്കേറ്റത്. ഇവരെ വിവിധ ആശുപത്രികളിൽ പ്രവേശിപ്പിച്ചിരിക്കുകയാണ്. സംഘർഷത്തിന് പിന്നാലെ കെഎസ്യു യൂണിറ്റ് പ്രസിഡന്റ് അതുൽ, എസ്എഫ്ഐ പ്രവർത്തകൻ അനന്തു, വിദ്യാർത്ഥിയായ മാലിക്, പുറത്ത് നിന്നെത്തിയ ഹഫീസ് എന്നിവരാണ് അറസ്റ്റിലായത്. ജാമ്യമില്ലാ വകുപ്പുകൾ ചേർത്ത് ഇവർക്കെതിരെ കേസ് രജിസ്റ്റർ ചെയ്തിട്ടുണ്ട്.
Comments