ഇനി ഒരടികൂടി മുന്നോട്ട് പോകാനാവില്ലെന്ന് തോന്നി; പക്ഷെ, ഞാൻ മരിക്കാൻ പോകുന്നില്ല; അഭിമുഖത്തിനിടെ പൊട്ടിക്കരഞ്ഞ് സാമന്ത

തെന്നിന്ത്യയിലെ താരസുന്ദരിമാരിൽ ഒരാളാണ് സാമന്ത. എന്നാൽ, കഴിഞ്ഞ കുറച്ചു നാളുകൾക്ക് മുമ്പ് വന്ന ഒരു വാർത്ത ആരാധകരെയും സിനിമാ പ്രേമികളെയും വേദനയിലേയ്‌ക്ക് തള്ളിയിട്ടു. പേശികൾക്ക് ബലക്ഷയം സംഭവിക്കുന്ന മയോസൈറ്റിസ് എന്ന രോഗാവസ്ഥയോട് പോരാടുകയാണ് നടി സാമന്ത. താരം തന്നെയാണ് ഇത് വെളിപ്പെടുത്തിയത്. ഇപ്പോൾ, തന്റെ ഏറ്റവും പുതിയ ചിത്രമായ യശോദയുടെ പ്രചാരണ പരിപാടികളുടെ തിരക്കിലാണ് താരം. സിനിമയുമായി ബന്ധപ്പെട്ട് നടത്തിയ ഒരു അഭിമുഖത്തിൽ മയോസൈറ്റിസിനോട് എങ്ങനെയാണ് പോരാടിയതെന്ന് തുറന്നു പറയുകയാണ് നടി.

‘ജീവഹാനിയുണ്ടാക്കുന്ന രോ​ഗമല്ല മയോസൈറ്റിസ് . ജീവിതത്തിൽ ചില ദിവസങ്ങൾ നല്ലതും മറ്റുചിലത് മോശവുമായിരിക്കും. ചില ദിവസങ്ങളിൽ കിടക്കയിൽ നിന്ന് എഴുന്നേൽക്കാൻ പോലും ബുദ്ധിമുട്ടായിരുന്നു. ചിലദിവസങ്ങളിൽ പോരാടണമെന്ന് തോന്നും. പതിയെ പോരാടണമെന്ന് തോന്നുന്ന ദിവസങ്ങൾ കൂടി കൂടി വന്നു. മൂന്ന് മാസമായി ഇപ്പോൾ പോരാട്ടത്തിലാണ്. രോ​ഗാവസ്ഥ മുറുകിയപ്പോഴാണ് യശോദയുടെ ഡബ്ബിം​ഗ് നടക്കുന്നത്. റിലീസ് തീയതി നേരത്തെ പ്രഖ്യാപിച്ചതിനാൽ, മോശമായ ആരോഗ്യസ്ഥിതിയിൽ എനിക്ക് ഡബ്ബ് ചെയ്യേണ്ടി വന്നു. എന്ത് വന്നാലും ‍ഡബ്ബിം​ഗ് സ്വയം പൂർത്തിയാക്കുമെന്ന് ഞാൻ ഉറച്ചു നിന്നു. എനിക്ക് അത് പൂർത്തിയാക്കാൻ കഴിഞ്ഞതിൽ സന്തോഷമുണ്ട്’.

Comeback stronger, Sam ❤ @Samanthaprabhu2 pic.twitter.com/gkJPhgpPOe

— CinemaTicket (@CinemaTicket_) November 8, 2022

‘ഇനി ഒരടി കൂടി മുന്നോട്ട് പോകാനാവില്ലെന്ന് തോന്നിയ ദിവസങ്ങളുണ്ട്. പിന്നെ തിരിഞ്ഞു നോക്കുമ്പോൾ ഞാൻ ഇത്രയും ദൂരം എത്തിയതിൽ അത്ഭുതം തോന്നുന്നു. ഞാൻ യുദ്ധം ചെയ്തു കൊണ്ടിരിക്കുകയാണ്. ഞാൻ മാത്രമല്ല ഇങ്ങനെയെന്ന് എനിക്കറിയാം. പല സാഹചര്യങ്ങളോടും യുദ്ധങ്ങൾ ചെയ്യുന്ന ധാരാളം പേരുണ്ട്. ഒരിക്കൽ ഞങ്ങൾ ഈ യുദ്ധത്തിൽ വിജയിക്കും’ എന്ന് പറയുമ്പോൾ സാമന്ത പൊട്ടിക്കരഞ്ഞു. ‘എന്റെ അവസ്ഥ ജീവന് ഭീഷണിയാണെന്ന് പറയുന്ന ധാരാളം ലേഖനങ്ങൾ ഞാൻ കണ്ടു. ഞാൻ നിൽക്കുന്ന ഘട്ടം ജീവന് ഭീഷണിയല്ല. ഇത് ബുദ്ധിമുട്ടുള്ളതാണ്, പക്ഷേ ഞാൻ യുദ്ധം ചെയ്യാൻ ഇവിടെ തന്നെയുണ്ട്. ഞാൻ മരിക്കാൻ പോകുന്നില്ല’ എന്നും സാമന്ത പറഞ്ഞു.