സന്നിധാനം: നടൻ ദിലീപ് ശബരിമലയിലെത്തി ദർശനം നടത്തി. വെള്ളിയാഴ്ച രാവിലെ എട്ട് മണിയോടെയാണ് നടൻ സന്നിധാനത്തെത്തിയത്. വ്യാഴാഴ്ച രാത്രി തന്നെ അദ്ദേഹം ശബരിമലയിൽ എത്തിയിരുന്നു. തുടർന്ന് ദേവസ്വം ബോർഡ് ഗസ്റ്റഹൗസിൽ തങ്ങി രാവിലെ ദർശനം നടത്തി. ഏപ്രിലിലും ദിലീപ് ശബരിമലയിൽ ദർശനത്തിനെത്തിയരുന്നു.
കഴിഞ്ഞ ദിവസമായിരുന്നു മണ്ഡല മകരവിളക്ക് തീർത്ഥാടനത്തിനായി ശബരിമല നട തുറന്നത്. ക്ഷേത്രം തന്ത്രി കണ്ഠരര് രാജീവരുടെ സാന്നിധ്യത്തിൽ മേൽശാന്തി എൻ. പരമേശ്വരൻ നമ്പൂതിരിയാണ് നട തുറന്നത്. കൊറോണ മഹാമാരിക്ക് ശേഷം നിയന്ത്രണങ്ങൾ ഒഴിവാക്കിയ ആദ്യ തീർത്ഥാടന കാലമായതിനാൽ വലിയ ഭക്തജന തിരക്കാണ് സന്നിധാനത്ത് അനുഭവപ്പെടുന്നത്.
പ്രതിദിനം 60,000ത്തോളം ഭക്തർ ദർശനത്തിനായി വെർച്വൽ ക്യൂ വഴി ബുക്ക് ചെയ്തിട്ടുണ്ട്. അവധി ദിവസങ്ങളിൽ ഇത് 80,000ത്തിന് മുകളിലാണ്. തീർത്ഥാടകർക്ക് തൃപ്തിയോടെ തൊഴുതിറങ്ങാനുള്ള സൗകര്യം ഒരുക്കുകയാണ് ദൗത്യമെന്ന് എഡിജിപി എംആർ അജിത്ത് കുമാർ പ്രതികരിച്ചു.
