വിവാഹത്തിന് സൈന്യത്തെ ക്ഷണിച്ച മലയാളി ദമ്പതികൾക്ക് ആദരവുമായി സൈന്യം. പാങ്ങോട് സൈനിക കേന്ദ്രത്തിൽ വെച്ചാണ് തിരുവന്തപുരം സ്വദേശികളായ രാഹുൽ-കാർത്തിക ദമ്പതികളെ ആദരിച്ചത്.
പാങ്ങോട് സൈനിക കേന്ദ്രത്തിലേക്ക് ക്ഷണിക്കപ്പെട്ട ദമ്പതികളെ സ്റ്റേഷൻ കമാൻഡർ ബ്രിഗേഡിയർ ലളിത് ശർമ്മ പൂച്ചെണ്ട് നൽകിയാണ് സ്വീകരിച്ചത്. വിവാഹ ക്ഷണത്തിന് സൈന്യത്തിന്റെ നന്ദിയും അറിയിച്ചു. തുടർന്ന് മെമോന്റോ സമ്മാനിക്കുകയും ചെയ്തു.
നവംബർ പത്തിനാണ് തങ്ങളുടെ വിവാഹ ചടങ്ങിൽ പങ്കെടുക്കാനായി രാഹുലും കാർത്തികയും സൈന്യത്തെ ക്ഷണിച്ചത്. സൈന്യത്തിന്റെ നിരന്തരമായ സേവനത്തിന് നന്ദി പറഞ്ഞുകൊണ്ട് ‘ഡിയർ ഹീറോസ്’ എന്ന അഭിവാദ്യത്തോടെയാണ് കുറിപ്പ് തുടങ്ങിയത്. സൈനികരുടെ രാജ്യ സ്‌നേഹത്തിനും നിശ്ചയദാർഢ്യത്തിനും നന്ദിയുള്ളവരാണ് ഓരോ പൗരനെന്നും പ്രിയപ്പെട്ടവരോടൊപ്പം സന്തോഷകരമായ ദിനങ്ങൾ സമ്മാനിച്ചതിന് നന്ദിയെന്നുമാണ് കുറിപ്പിലുണ്ടായിരുന്നത്.
ഞങ്ങളുടെ വിവാഹം അത്യധികം സന്തോഷപൂർണമായി നടത്താൻ കാരണം നിങ്ങളാണെന്നും ജീവിതത്തിലെ സുപ്രധാന ദിനത്തിൽ സൈനികരെ ക്ഷണിക്കുന്നതിൽ അതിയായ സന്തോഷമുണ്ടെന്നും നിങ്ങളുടെ സാന്നിധ്യവും അനുഗ്രഹവും തങ്ങൾ ആഗ്രഹിക്കുന്നതായും കുറിപ്പിൽ പറയുന്നു. ഞങ്ങളെ സംരക്ഷിച്ചതിന് നന്ദിയെന്നുമാണ് കുറിപ്പിലുണ്ടായിരുന്നത്.
ദമ്പതികൾക്ക് ആശംസകളുമായി സൈന്യം സമൂഹമാദ്ധ്യമങ്ങളിൽ കുറിപ്പ് പോസ്റ്റ് ചെയ്തിരുന്നു. വിവാഹ ക്ഷണത്തിന് രാഹുലിനും കാർത്തികയ്‌ക്കും നന്ദി അറിയിക്കുകയും സന്തോഷകരമായ വിവാഹജീവിതം ആശംസിക്കുകയും ചെയ്യുന്നു എന്ന അടിക്കുറിപ്പോടെയാണ് വിവാഹ ക്ഷണക്കത്ത് സൈന്യം സോഷ്യൽ മീഡിയകളിൽ പോസ്റ്റ് ചെയ്തത്. കത്ത് സമൂഹമാദ്ധ്യമങ്ങളിൽ നിരവധി പേരാണ് ഏറ്റെടുത്തത്.
Comments