തിരുവനന്തപുരം: എസ്എസ്എൽസി, പ്ലസ് ടു പരീക്ഷ തീയതികൾ പ്രഖ്യാപിച്ച് വിദ്യാഭ്യാസ മന്ത്രി വി. ശിവൻകുട്ടി. 2023 മാർച്ച് ഒമ്പത് മുതൽ 29 വരെയാണ് എസ്എസ്എൽസി പരീക്ഷ നടക്കുക. നാലര ലക്ഷം വിദ്യാർത്ഥികൾ പരീക്ഷയെഴുതും.
ഏപ്രിൽ മൂന്നിന് മുല്യനിർണയം ആരംഭിക്കുന്നതാണ്. മെയ് 10നുള്ളിൽ പരീക്ഷാ ഫലം പ്രഖ്യാപിക്കും. മൂല്യനിർണയത്തിനായി സംസ്ഥാനത്താകെ 70 ക്യാമ്പുകൾ പ്രവർത്തിക്കുമെന്നും ഇവിടെ 9,762 അദ്ധ്യാപകർ ചേർന്ന് മൂല്യനിർണയം നടത്തുമെന്നും വിദ്യാഭ്യാസമന്ത്രി അറിയിച്ചു. അതേസമയം പത്താം ക്ലാസ് വിദ്യാർത്ഥികൾക്കായി മോഡൽ പരീക്ഷകൾ 2023 ഫെബ്രുവരി 27ന് ആരംഭിച്ച് മാർച്ച് 3ന് അവസാനിക്കും.
ഹയർ സെക്കൻഡറി, വൊക്കേഷണൽ ഹയർ സെക്കൻഡറി പരീക്ഷകൾ 2023 മാർച്ച് 10ന് ആരംഭിച്ച് മാർച്ച് 30ന് അവസാനിക്കുന്ന രീതിയിലാണ് ക്രമീകരിച്ചിരിക്കുന്നത്. മോഡൽ എക്‌സാം 2023 ഫെബ്രുവരി 27ന് തുടങ്ങും. മാർച്ച് മൂന്നിനാണ് പൂർത്തിയാകുക.
രണ്ടാം വർഷ ഹയർ സെക്കൻഡറി പ്രാക്ടിക്കൽ പരീക്ഷകൾ 2023 ഫെബ്രുവരി 1നും വൊക്കേഷണൽ ഹയർ സെക്കൻഡറി പ്രാക്ടിക്കൽ പരീക്ഷകൾ 2023 ജനുവരി 25നും ആരംഭിക്കുന്നതാണ്. ഒമ്പത് ലക്ഷത്തിലധികം വിദ്യാർത്ഥികൾ ഹയർ സെക്കൻഡറി പരീക്ഷകൾ എഴുതും. 60,000ത്തോളം വിദ്യാർത്ഥികളാണ് വൊക്കേഷണൽ ഹയർ സെക്കൻഡറി പൊതുപരീക്ഷയുഴുതുക.
പ്ലസ് ടു പരീക്ഷകളുടെ മൂല്യനിർണയം 2023 ഏപ്രിൽ 3ന് ആരംഭിക്കും. പരീക്ഷാഫലം മെയ് 25നകം പ്രഖ്യാപിക്കും. ഹയർ സെക്കൻഡറിയ്‌ക്ക് 82 മൂല്യനിർണയ ക്യാമ്പുകളാണ് ഉണ്ടാവുക. 24,000ത്തോളം അദ്ധ്യാപകർ
മൂല്യനിർണയത്തിൽ പങ്കെടുക്കും. വൊക്കേഷണൽ ഹയർ സെക്കൻഡറിക്ക് വേണ്ടി എട്ട് മൂല്യനിർണയ ക്യാമ്പുകൾ ഉണ്ടാവും. 3,500 അദ്ധ്യാപകർ മൂല്യനിർണയ ക്യാമ്പുകളിൽ പങ്കെടുക്കും.
