വസ്ത്രം പോലെ തന്നെ നമുക്ക് പ്രധാനപ്പെട്ടതാണ് ചെരിപ്പുകൾ. ഒരു കാലത്ത് സ്ലിപ്പറുകളായിരുന്നു മലയാളിയുടെ പാദങ്ങളെ സംരക്ഷിച്ചിരുന്നതെങ്കിൽ ഇന്ന് ഫാഷൻ സങ്കൽപങ്ങളുടെ കടന്നുവരവ് അവിടെയും വലിയ മാറ്റമാണ് ഉണ്ടാക്കിയിരിക്കുന്നത്. ചെറുതും വലുതും ഹീലുളളതും ഹീലില്ലാത്തതും പൂക്കളുളളതും പാദം മൃദുവാക്കുന്നതുമൊക്കെയായി ചെരിപ്പുകൾ അനവധിയാണ് ഇന്ന് വിപണിയിൽ. കാൽപാദങ്ങളുടെ മൃദുത്വം നിലനിർത്തുന്നത് മുതൽ അതിന്റെ ആകൃതി സംരക്ഷിക്കുന്നതിലും ചെരിപ്പുകൾക്ക് വലിയ സ്ഥാനമാണുളളത്.
നടക്കാൻ തുടങ്ങുന്ന പ്രായം മുതൽ നമ്മുടെ നിത്യ ജീവിതത്തിന്റെ ഭാഗമായി ചെരിപ്പും മാറുന്നു. കാലിനെ സംരക്ഷിക്കുകയെന്ന ദൗത്യത്തിൽ ഒതുങ്ങിയിരുന്ന ചെരിപ്പുകൾ ഇന്ന് ഫാഷന്റെ കൂടി ഭാഗമാണ്. അതുകൊണ്ടു തന്നെ വിവിധ തരത്തിലുള്ള ചെരിപ്പുകൾ നാം കാലിൽ അണിയുന്നു. എന്നാൽ സൂക്ഷിച്ച് ഉപയോഗിച്ചില്ലെങ്കിൽ ചെരുപ്പുകൾ കാലിന് പണി തരുമെന്നാണ് വിദഗ്ധർ പറയുന്നത്.
ചെരിപ്പുകൾ തിരഞ്ഞെടുക്കുമ്പോൾ ചില കാര്യങ്ങൾ നിർബന്ധമായും ശ്രദ്ധിക്കണം. അല്ലെങ്കിൽ നിരവധി ആരോഗ്യപ്രശ്നങ്ങളാകും ഇത് സൃഷ്ടിക്കുക. ചെരിപ്പ് വാങ്ങുമ്പോൾ എല്ലായ്പ്പോഴും കാലിന് അനുയോജ്യമുള്ളവ വാങ്ങാൻ പ്രത്യേകം ശ്രദ്ധിക്കണം.
പാദത്തിന്റെ അളവിന് അനുസരിച്ച് വേണം ചെരിപ്പുകൾ തിരഞ്ഞെടുക്കാൻ. പാദത്തിനേക്കാൾ ചെറുതോ, വലുതോ തിരഞ്ഞെടുക്കരുത്. അളവിലെ വ്യത്യാസം നിങ്ങളുടെ ബാലൻസ് തെറ്റിക്കുമെന്ന കാര്യത്തിൽ സംശയമില്ല.
പാദങ്ങളുടെ വളവ് അഥവാ ആർക് ഷെയ്പ്പ് മനസ്സിലാക്കി വേണം ചെരിപ്പുകൾ തിരഞ്ഞെടുക്കാൻ. ആർക് ഭാഗം കുറഞ്ഞ പാദമുള്ളവരിൽ കാലുകളിൽ സന്ധിവേദന അനുഭവപ്പെടാനുള്ള സാദ്ധ്യത വളരെ കൂടുതലാണ്. അതിനാൽ ആ ഭാഗത്തിന് താങ്ങ് ലഭിക്കുന്ന തരത്തിലുള്ള ചെരിപ്പുകൾ വേണം തിരഞ്ഞെടുക്കാൻ.
സ്ലിപ്പറുകൾ പതിവായി ഉപയോഗിക്കുന്നവരായിരിക്കും നമ്മൾ. പാദങ്ങളുടെ അളവിന് അനുസരിച്ചാണ് സ്ലിപ്പറുകൾ വാങ്ങാറുള്ളതെങ്കിലും കുറച്ച് മാസങ്ങൾ കഴിയുമ്പോൾ ഇവയുടെ അളവിൽ വ്യത്യാസം വരുന്നതായി കാണാം. ഈ സാഹചര്യത്തിൽ തേഞ്ഞുതീരുന്നതുവരെ ഉപയോഗിക്കാതെ പുതിയത് വാങ്ങണമെന്നാണ് വിദഗ്ധർ പറയുന്നത്.
