ഇലക്ട്രിക് ബൈക്കുകളിലെ കരുത്തൻമാർ; വേ​ഗത അറിയേണ്ടേ?

ഇന്ത്യയിലും വൈദ്യുത വാഹന വിപ്ലവം കരുത്താർജ്ജിക്കുകയാണ്. ഇന്റേണൽ കംമ്പസ്റ്റിൻ എൻജിൻ വാഹനങ്ങൾക്കൊപ്പം തന്നെ വൈദ്യുതി വാഹനങ്ങളും വിപണിയിൽ മിന്നും പ്രകടനമാണ് കാഴ്ച വെയ്‌ക്കുന്നത്. അടുത്തിടെ ഇന്ത്യൻ വിപണിയിൽ ശ്രദ്ധിക്കപ്പെട്ട ഏറ്റവും വേഗമുള്ള വൈദ്യുതി ഇരുചക്രവാഹനങ്ങൾ ഏതെല്ലാമാണെന്ന് നോക്കാം.

സിംപിൾ വൺ- ബെംഗളൂരിൽ നിന്നുള്ള വൈദ്യുതി ഇരുചക്രവാഹന നിർമാണ കമ്പനിയാണ് സിംപിൾ. അടുത്തിടെ കമ്പനി പുറത്തിറക്കിയ ഒരു മോഡലാണ് വൺ. 236 കിലോമീറ്റർ റേഞ്ചാണ് വാഹനത്തിന് കമ്പനി പറയുന്നത്. പ്രായോ​ഗിമായി 190 കിലോമീറ്റർ റേഞ്ചാണ് മോഡലിന് ലഭിക്കുന്നത്. 2.77 സെക്കന്റ് കൊണ്ട് മണിക്കൂറിൽ 40 കിലോമീറ്റർ വേഗത്തിലേക്ക് കുതിക്കാൻ സിംപിൾ വണ്ണിന് സാധിക്കും.

ഒബെൻ റോർ- ബെംഗളൂരു ആസ്ഥാനമായ ഒബെൻ ഇലക്ട്രിക് കമ്പനിയുടെ ആദ്യ വാഹനമാണ് റോർ ഇലക്ട്രിക് മോട്ടോർസൈക്കിൾ. ഒറ്റ ചാർജിൽ 200 കിലോമീറ്റർ സഞ്ചരിക്കാൻ ഈ സ്കൂട്ടറിന് സാധിക്കും. 4.4 കിലോവാട്ടിന്റെ ബാറ്ററിയാണ് വാഹനത്തിന്റെ കരുത്ത്. ഇക്കോ, സിറ്റി, ഹാവോക് എന്നിങ്ങനെ മൂന്ന് ഡ്രൈവിം​ഗ് മോഡുകളിലാണ് വാഹനം ലഭിക്കുന്നത്. 70 കിലോമീറ്ററാണ് വാഹനത്തിന്റെ പരമാവധി വേ​ഗത.

ഹോപ് ഒക്‌സോ- റിവേഴ്‌സ് അസിസ്റ്റ്, സ്മാർട്ട്‌ഫോൺ കണക്ടിവിറ്റി, ആന്റി തെഫ്റ്റ് അലാം, യുഎസ്ബി ചാർജിം​ഗ്, ബ്ലൂടൂത്ത് തുടങ്ങിയ സൗകര്യങ്ങളോടെ എത്തിയ ഇലക്ട്രിക് ബൈക്കാണ് ഒക്‌സോ. 3.75 കിലോവാട്ട് ലിഥിയം അയൺ ബാറ്ററിയും മൂന്ന് കിലോവാട്ട് മോട്ടോറും വാഹനത്തിന് നൽകിയിരിക്കുന്നു. ഇകോ, പവർ, സ്‌പോർട് എന്നിങ്ങനെ മൂന്ന് ഡ്രൈവിം​ഗ് മോഡുകളാണ് ബൈക്കിനുള്ളത്. ഇകോ മോഡിൽ 150 കിലോമീറ്റർ മൈലേജ് ലഭിക്കും. 90 കിലോമീറ്ററാണ് മോഡലിന്റെ പരമാവധി വേ​ഗത.

ഓല എസ് 1 പ്രൊ- ഇന്ത്യൻ ഇലക്ട്രിക് വാഹന വിപണിയിൽ വലിയ മുന്നേറ്റം നടത്തുന്ന കമ്പനിയാണ് ഓല. കമ്പനിയുടെ ഏറ്റവും പുതിയ സ്കൂട്ടറുകളിൽ ഒന്നാണ് ഓല എസ് 1 പ്രൊ. ഒറ്റ ചാർജിൽ 181 കിലോമീറ്റർ സഞ്ചരിക്കാൻ വാഹനത്തിന് സാധിക്കും. ഇകോ, നോർമൽ സ്‌പോർട്, ഹൈപർ എന്നിങ്ങനെ നാല് ഡ്രൈവിം​ഗ് മോഡുകളിലാണ് വാഹനം ലഭിക്കുന്നത്. മണിക്കൂറിൽ 116 കിലോമീറ്റർ വേ​ഗത ഓല എസ് 1 പ്രൊയ്‌ക്കുണ്ട്. 7.0 ഇഞ്ച് ടച്ച്‌സ്‌ക്രീൻ കൺസോളിൽ ബ്ലൂടൂത്ത് കണക്ടിവിറ്റി, ബ്രൗസിങ്, മ്യൂസിക്, ക്രൂയിസ് കൺട്രോൾ തുടങ്ങിയ സൗകര്യങ്ങളും മോഡലിന് കമ്പനി വാ​ഗ്ദാനം ചെയ്യുന്നു.

എഥർ 450 എക്‌സ്- ബെംഗളൂരു ആസ്ഥാനമായുള്ള കമ്പനിയാണ് എഥർ. കമ്പനിയുടെ 450 എക്സ്-ന് ഒറ്റ ചാർജിൽ 85 കിലോമീറ്റർ മൈലേജ് ലഭിക്കുന്നു. കൂടുതൽ മൈലേജിനായി കരുത്തുള്ള 3.7 കിലോവാട്ട് ബാറ്ററിയും കമ്പനി നൽകുന്നുണ്ട്. ഈ ബാറ്ററി ഘടിപ്പിച്ചാൽ മൈലേജ് 105 ലഭിക്കും.