ന്യൂഡൽഹി: രാജ്യതലസ്ഥാനത്ത് നടന്ന ശ്രദ്ധാ മോഡൽ കൊലപാതകത്തിന്റെ കൂടുതൽ വിവരങ്ങൾ പുറത്തുവിട്ട് പോലീസ്. പിതാവിനെ കൊന്ന് പത്ത് കഷ്ണങ്ങളാക്കി വെട്ടിനുറുക്കിയായിരുന്നു ഫ്രിഡ്ജിൽ സൂക്ഷിച്ചതെന്ന് ഡൽഹി ക്രൈംബ്രാഞ്ച് വെളിപ്പെടുത്തി. അമ്മ പൂനം, മകൻ ദീപക് എന്നിവരാണ് കേസിലെ പ്രതികൾ. അഞ്ജൻ ദാസ് എന്നയാളാണ് കൊല്ലപ്പെട്ടത്.
കിഴക്കൻ ഡൽഹിയിലെ ത്രിലോക്പുരിക്ക് സമീപം പാണ്ഡവ് നഗറിലാണ് സംഭവം നടന്നത്. പൂനം രണ്ടാമാതായി വിവാഹം കഴിച്ചയാളാണ് കൊല്ലപ്പെട്ട അഞ്ജൻ ദാസ്. ആദ്യ ഭർത്താവിൽ ജനിച്ച മകനാണ് ദീപക്. 2016ലാണ് പൂനത്തിന്റെ ഭർത്താവ് മരിച്ചത്. തുടർന്ന് 2017ൽ അഞ്ജൻ ദാസിനെ വിവാഹം ചെയ്തു.
അമ്മയും മകനും ചേർന്ന് അഞ്ജൻ ദാസിനെ ആറ് മാസങ്ങൾക്ക് മുമ്പാണ് കൊലപ്പെടുത്തിയത്. ശേഷം മൃതദേഹം പത്ത് കഷ്ണങ്ങളാക്കി വെട്ടിനുറുക്കി വീട്ടിലെ ഫ്രഡ്ജിൽ സൂക്ഷിച്ചു. പിടിക്കപ്പെട്ടതോടെ പ്രതികൾ ഇരുവരും കുറ്റം സമ്മതിച്ചിട്ടുണ്ട്.
മെയ് 30നായിരുന്നു കൊലപാതകം. അഞ്ജൻ ദാസിന് ഉറക്കഗുളിക കലർത്തിയ മദ്യം നൽകി മയക്കി കിടത്തി കഴുത്തറുത്ത് കൊല്ലുകയായിരുന്നു. ഒരു ദിവസം മുഴുവനും മൃതദേഹം അങ്ങനെ സൂക്ഷിച്ചു. രക്തം മുഴുവൻ വാർന്നുപോകാനാണ് ഇപ്രകാരം ചെയ്തത്. അതിന് ശേഷം പത്ത് കഷ്ണങ്ങളാക്കി വെട്ടിനുറുക്കി. പിന്നീട് പല ദിവസങ്ങളിലായി ഡൽഹിയിലെ ആളൊഴിഞ്ഞ ഭാഗത്ത് ഉപേക്ഷിക്കുകയായിരുന്നുവെന്ന് പ്രതികൾ മൊഴി നൽകിയിട്ടുണ്ട്.
കൊല്ലപ്പെട്ടയാളുടെ ശരീരഭാഗങ്ങളിൽ ആറ് കഷ്ണങ്ങൾ പോലീസ് ഇതിനോടകം കണ്ടെടുത്തു കഴിഞ്ഞു. ജൂൺ അഞ്ചിനായിരുന്നു രാംലീല മൈതാനത്തിന് സമീപത്ത് നിന്നും ചില ശരീരഭാഗങ്ങൾ ആദ്യമായി പോലീസിന് ലഭിച്ചത്. മൂന്ന് ദിവസത്തിന് ശേഷം രണ്ട് കാലുകളും തുടകളും തലയോട്ടിയും മറ്റൊരിടത്ത് നിന്ന് കണ്ടെത്തി. ഇതോടെ കേസ് രജിസ്റ്റർ ചെയ്യുകയായിരുന്നു. ചില കുടുംബപ്രശ്നങ്ങളാണ് അഞ്ജൻ ദാസിന്റെ കൊലപാതകത്തിലേക്ക് നയിച്ചതെന്ന് പോലീസ് പറയുന്നു. സംഭവത്തിൽ അന്വേഷണം തുടരുകയാണ്.
