കോഴിക്കോട് : പരിപാടിയിൽ മൈക്കിന് പകരം മൂർഖനെ ഉപയോഗിച്ച വാവ സുരേഷിനെതിരെ വ്യാപക വിമർശനം. കോഴിക്കോട് മെഡിക്കൽ കോളേജിൽ ക്ലിനിക്കൽ നഴ്സിങ് എജ്യൂക്കേഷനും നഴ്സിങ് സർവീസ് ഡിപ്പാർട്ട്മെന്റ് സംയുക്തമായി സംഘടിപ്പിച്ച പരിപാടിയിലാണ് വാവ സുരേഷ് ക്ലാസ് എടുത്തത്. പരിപാടിക്കിടെ മൈക്ക് തകരാറിലായപ്പോൾ മൈക്കിന് പകരം ഇയാൾ പാമ്പിനെ ഉപയോഗിച്ചുവെന്നാണ് വിമർശനം.
ക്ലാസെടുക്കാനായി പാമ്പിനെ കൊണ്ടുവന്നതും വ്യാപക വിമർശനങ്ങൾക്ക് വഴിവെച്ചു. പാമ്പുപിടുത്തത്തിൽ ശാസ്ത്രീയ മാർഗങ്ങൾ അവലംബിക്കാത്ത സുരേഷിനെ മെഡിക്കൽ കോളേജ് പോലുള്ള സ്ഥാപനത്തിൽ കൊണ്ടുവന്ന് ക്ലാസ് എടുത്തതിനെതിരെ വിദഗ്ധരും രംഗത്തെത്തി. നിയമവിരുദ്ധമായ കാര്യമാണ് വാവ സുരേഷ് ചെയ്തത്. അശാസ്ത്രീയമായ രീതിയിൽ പാമ്പുകളെ കൈകാര്യം ചെയ്തതിലൂടെ കുപ്രസിദ്ധി നേടിയ വ്യക്തിയാണ് വാവ സുരേഷ് എന്ന ആക്ഷേപങ്ങളും ഉയരുന്നുണ്ട്.
കഴിഞ്ഞ ഫെബ്രുവരിയിൽ കോട്ടയം നീലംപേരൂർ വച്ച് വാവ സുരേഷിനെ മൂർഖൻ പാമ്പ് കടിച്ചിരുന്നു. പിടികൂടിയ പാമ്പിനെ ചാക്കിൽ കയറ്റുന്നതിനിടെ തുടയിൽ കടിക്കുകയായിരുന്നു. ഏറെ ദിവസത്തെ വിദഗ്ധ ചികിത്സക്ക് ശേഷമാണ് സുരേഷിനെ ജീവിതത്തിലേക്ക് തിരിച്ചുകൊണ്ടുവന്നത്.
