മുംബൈ: പ്രായപൂർത്തിയാകാത്ത പെൺകുട്ടികളെ പീഡിപ്പിച്ച പുരോഹിതൻ സേവനമനുഷ്ടിച്ചിരുന്ന പള്ളി പൊളിച്ച് നീക്കി അധികൃതർ. നവി മുംബൈയിലെ സെന്റ് ബേത്തൽ ചർച്ചാണ് മുനിസിപ്പൽ കോർപ്പറേഷൻ അധികൃതർ പൊളിച്ച് നീക്കിയത്. പ്രായപൂർത്തിയാകാത്ത നിരവധി കുട്ടികളെയാണ് ഇവിടെവെച്ച് പുരോഹിതനായ രാജ്കുമാർ യേശുദാസൻ പീഡിപ്പിച്ചത്.
ദേശീയ ബാലവകാശ കമ്മീഷന്റെ ഇടപെടലിനെ തുടർന്നാണ് പള്ളി പൊളിച്ച് നീക്കിയത്. രാജ്കുമാറിനെതിരെ കമ്മീഷനിലും നിരവധി പരാതികൾ ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ പ്രാഥമിക അന്വേഷണത്തിൽ അനധികൃതമായാണ് പള്ളി പ്രവർത്തിക്കുന്നത് എന്ന് വ്യക്തമായി.ഇതോടെ പള്ളി പൊളിച്ച് നീക്കാൻ കമ്മീഷൻ കോർപ്പറേഷനോട് നിർദ്ദേശിക്കുകയായിരുന്നു.
പള്ളിയുടെ ഭാഗമായി അനാഥാലയം പ്രവർത്തിക്കുന്നുണ്ട്. ഇതിലെ അന്തേവാസികളായ കുട്ടികളെയാണ് പീഡനത്തിന് ഇരയാക്കിയത്. ഇവിടെ പാർപ്പിച്ചിരുന്ന 45 കുട്ടികളെയും രക്ഷിച്ചു.
അനാഥാലയത്തിലെ മൂന്ന് പെൺകുട്ടികളാണ് പുരോഹിതനെതിരെ പരാതിയുമായി ആദ്യം രംഗത്ത് എത്തിയത്. ഇതിന് പിന്നാലെ കൂടുതൽ കുട്ടികൾ പരാതിയുമായി മുന്നോട്ടുവരികയായിരുന്നു. അനാഥാലയത്തിലെ നിരവധി കുട്ടികൾ നിർബന്ധിത ഗർഭഛിദ്രത്തിന് വിധേയരായതായും വിവരമുണ്ട്.
Comments