പഠനാവശ്യങ്ങൾക്കോ ജോലി സംബന്ധമായ കാര്യങ്ങൾക്കോ ദൂരസ്ഥലങ്ങളിൽ താമസിക്കേണ്ടി വന്നിട്ടുള്ളവരാണ് നമ്മളിൽ പലരും. ഇത്തരത്തിൽ താമസിക്കുമ്പോൾ മിക്കപ്പോഴും നമുക്ക് മുറി പങ്കിടേണ്ടി വരാറുണ്ട്. വ്യക്തിശുചിത്വം പാലിക്കാൻ എത്ര മടിയുള്ളവരാണ് നമ്മളെങ്കിലും, ഇത്തരം സാഹചര്യങ്ങളിൽ മറ്റുള്ളവരെ വെറുപ്പിക്കാതിരിക്കാൻ വേണ്ടിയെങ്കിലും നമ്മൾ വൃത്തിയായി നടക്കാൻ ശ്രമിക്കാറുണ്ട്. എന്നാൽ, നാല് മാസമായി കുളിക്കാൻ കൂട്ടാക്കാത്ത ഒരു റൂം മേറ്റിനെ നിങ്ങൾക്ക് സഹിക്കാനാകുമോ?
നാല് മാസമായി കുളിക്കാത്ത റൂം മേറ്റിന്റെ വിവരങ്ങൾ സാമൂഹിക മാദ്ധ്യമത്തിൽ പങ്കുവെച്ചിരിക്കുകയാണ് ഒരു യുവതി. റെഡ്ഡിറ്റിലാണ് യുവതിയുടെ പരിവേദനം.
വ്യക്തിശുചിത്വത്തിന്റെ കാര്യത്തിൽ ഒരു ശ്രദ്ധയുമില്ലാത്ത ഒരു റൂം മേറ്റ് എനിക്കുണ്ട്. ഞങ്ങൾ നാല് മാസമായി ഒരുമിച്ച് താമസിക്കുന്നു. എന്നാൽ ഇനിയും അവളോടൊപ്പം തുടരാൻ എനിക്ക് കഴിയില്ല. യുവതി കുറിക്കുന്നു.
ഈ നാല് മാസത്തിനിടെ ഒരിക്കൽ പോലും അവൾ കുളിച്ചതായി എനിക്ക് അറിവില്ല. അവൾ എല്ലാ ദിവസവും അതിരാവിലെ രണ്ട് മണിക്കൂർ ഓടാൻ പോകാറുണ്ട്. അതിന് ശേഷമുള്ള ദുർഗന്ധമാണ് സഹിക്കാൻ പറ്റാത്തത്. പലപ്പോഴും എനിക്ക് ഓക്കാനം വന്നിട്ടുണ്ട്. യുവതി തുടരുന്നു.
പല ആവർത്തി പറഞ്ഞിട്ടും റൂം മേറ്റ് കുളിക്കാൻ കൂട്ടാക്കാത്തതോടെ, യുവതി വീട്ടുടമയോട് പരാതിപ്പെട്ടു. കുളിക്കാതിരിക്കുന്നത് ഒരു തരത്തിൽ മലിനീകരണമാണ്. അത് സ്വന്തം ആരോഗ്യം മാത്രമല്ല, മറ്റുള്ളവരുടെ ആരോഗ്യവും അപകടത്തിലാക്കും എന്ന് വീട്ടുടമ ഉപദേശിച്ചിട്ടും അവൾ കുളിക്കാൻ കൂട്ടാക്കിയില്ല. ഒടുവിൽ അറ്റകൈ പ്രയോഗം എന്ന നിലയിൽ അവളെ പുറത്താക്കാൻ തന്നെ വീട്ടുടമ തീരുമാനിച്ചു. മുപ്പത് ദിവസത്തിനുള്ളിൽ വീടൊഴിഞ്ഞ് പോകണമെന്ന് ഉടമ അവൾക്ക് അന്ത്യശാസനം നൽകി.
എല്ലാവരും ചേർന്ന് തന്നെ വംശീയമായി അധിക്ഷേപിക്കുന്നു എന്ന പ്രചാരണമുയർത്തിയാണ് അവൾ ഞങ്ങളെ പ്രതിരോധിക്കാൻ ശ്രമിച്ചത്. എന്നാൽ, ദുർഗന്ധം കാരണം അവളോടൊപ്പം നിന്ന ലിബറൽ സുഹൃത്തുക്കളും അവളെ കൈയ്യൊഴിഞ്ഞു. ഒടുവിൽ ഗത്യന്തരമില്ലാതെ അവൾ കുളിക്കാൻ തയ്യാറായിരിക്കുകയാണെന്നും യുവതി അപ്ഡേറ്റ് ചെയ്യുന്നുണ്ട്.
റൂം മേറ്റ് കുളിക്കാൻ തയ്യാറായതോടെ പ്രശ്നം താത്കാലികമായി അവസാനിച്ചിരിക്കുകയാണ്. ഇനിയും അവൾ പഴയപടിയായാൽ വെറുതെ വിടില്ലെന്നും യുവതി പറയുന്നു.
Comments