ന്യൂഡൽഹി: ചന്ദ്രനെ ചുറ്റിവരുന്ന സ്വകാര്യദൗത്യമായ സ്പേസ് എക്സ് യാത്രാ സംഘത്തിൽ ഇന്ത്യയെ പ്രതിനിധീകരിച്ച് ടെലിവിഷൻ നടനായ ദേവ് ജോഷിയും. ജാപ്പനീസ് ശതകോടീശ്വരൻ യുസാകു മെയ്സാവയാണ് ഗുജറാത്ത് സ്വദേശിയായ ദേവ് ജോഷിയുടെ പേര് നിർദ്ദേശിച്ചത്.
2023 ലാണ് ചാന്ദ്രദൗത്യം. ദേവ് ജോഷിയെ കൂടാതെ അമേരിക്കൻ ഡിജെ സ്റ്റീവ് ഓക്കി, കൊറിയൻ റാപ്പർ ടോപ്പ്, യൂട്യൂബർ ടിം ടോഡ്, ഐറിഷ് ഫോട്ടോഗ്രാഫർ റൈനാൻ ആദം, അമേരിക്കൻ ഡോക്യുമെന്ററി ഫിലിം മേക്കർ ബ്രണ്ടൻ ഹാൾ, യുകെ ഫോട്ടോഗ്രാഫർ കരീം ഇലിയ, ചെക്ക് ഡാൻസർ യെമി ആഡ് എന്നിവരും യാത്രയിൽ പങ്കുചേരുന്നുണ്ട്.
ഞാൻ എപ്പോഴും പോസിറ്റീവ് ആയി ഇരിക്കുന്നയാളാണ്. കാരണം അത്ഭുതങ്ങൾ എപ്പോൾ വേണമെങ്കിലും സംഭവിക്കാം. അത് ചന്ദ്രന്റെ രൂപത്തിലാണ് എന്റെ മുന്നിൽ പ്രത്യക്ഷപ്പെട്ടത്,’ എന്നായിരുന്നു ദേവ് ജോഷി സമൂഹമാദ്ധ്യമങ്ങളിൽ കുറിച്ചത്. ഇന്ത്യയെ പ്രതിനീധികരിച്ച് ഈ ദൗത്യത്തിൽ പങ്കെടുക്കാൻ കഴിഞ്ഞത് തന്റെ ഭാഗ്യമാണെന്നും അദ്ദേഹം പറഞ്ഞു. ജീവിതത്തിൽ ഒരിക്കൽ മാത്രം സംഭവിക്കുന്ന ഈ അദ്ഭുതത്തിന്റെ ഭാഗമാകാൻ കഴിഞ്ഞതിൽ താൻ അഭിമാനിക്കുന്നുവെന്നും അദ്ദേഹം കൂട്ടിച്ചേർത്തു.
സോണി സാബിന്റെ ബാൽ വീർ, ബാൽ വീർ റിട്ടേൺസ് എന്നീ ചിത്രങ്ങളിലെ കഥാപാത്രത്തെ അവതരിപ്പിച്ചതിലൂടെ പ്രശസ്തനായ വ്യക്തിയാണ് ദേവ് ജോഷി.
2018 ൽ സ്പേസ് എക്സ് സിഇഒ ഇലോൺ മസ്കാണ് തന്റെ സ്റ്റാർഷിപ് റോക്കറ്റിലെ ആദ്യ യാത്രക്കാരനായി മെയ്സാവയെ പ്രഖ്യാപിച്ചത്. ജപ്പാനിലെ ഏറ്റവും വലിയ ഓൺലൈൻ ഫാൻ റീട്ടെയിലർ സോസോടൗണിന്റെ സ്ഥാപകനായമെയ്സാവ,തുടർന്ന് യാത്രയിൽ തന്നോടൊപ്പം പങ്കുചേരാൻ താൽപ്പര്യമുള്ളവരെ ക്ഷണിക്കുകയായിരുന്നു.
