ഭോപ്പാൽ: പ്രധാനമന്ത്രി നരേന്ദ്രമോദിയെ വധിക്കണമെന്ന കോൺഗ്രസ്സ് നേതാവിന്റെ പരസ്യഭീഷണിയ്ക്ക് രാഹുൽ മറുപടി പറയണമെന്ന് മധ്യപ്രദേശ് മുഖ്യമന്ത്രി ശിവ്രാജ് സിംഗ് ചൗഹാൻ. കോൺഗ്രസ് നേതാവ് രാജാ പത്തേരിയയാണ് അണികളോട് നരേന്ദ്രമോദിയെ വധിക്കണമെന്ന പ്രകോപനപരമായ പ്രസംഗം നടത്തിയത്.
നരേന്ദ്രമോദി ഇന്ത്യയുടെ മാത്രമല്ല ലോകത്തിന്റെ നേതാവായി മാറിയിരിക്കുന്ന സമയമാണ്. ഇന്ത്യ ലോകത്തിന് മുന്നിൽ എല്ലാ രംഗത്തും മാതൃകയാകുന്നത് നരേന്ദ്രമോദിയുടെ അക്ഷീണമായ പ്രയത്നം മൂലമാണ്. ജനലക്ഷങ്ങളുടെ ഹൃദയത്തിലാണ് നരേന്ദ്രമോദിയുടെ സ്ഥാനം. ആ ലോകനേതാവിനെ വധിക്കണമെന്ന് പറയുന്നത് അത്യന്തം ഗുരുതരമായ കുറ്റമാണ്. ഇന്ത്യ മുഴുവൻ കറങ്ങി നടക്കുന്ന രാഹുൽ എവിടെപ്പോയെന്നും ചൗഹാൻ ചോദിച്ചു.
അണികളെ കൊലപാതകത്തിന് പ്രേരിപ്പിക്കുന്ന തരത്തിലേയ്ക്ക് കോൺഗ്രസ് എത്തിയിരിക്കുകയാണ്. ഈ രാജ്യത്തെ എങ്ങോട്ട് നയിക്കാനാണ് നിങ്ങളാഗ്രഹിക്കുന്നത്. പൊറുക്കാനാവാത്ത കുറ്റമാണ് രാജ്യദ്രോഹ പ്രസ്താവനയിലൂടെ ചെയ്യുന്നതെന്നും നേതാക്കൾ മറുപടി പറയണമെന്നും ശിവ്രാജ് സിംഗ് ചൗഹാൻ പറഞ്ഞു.
Comments