‘സമസ്ത ചൈനയെയും പാകിസ്താനെയും ഒറ്റക്കുതിപ്പിന് ഭസ്മീകരിക്കും‘; ആണവ വാഹക ശേഷിയുള്ള ഇന്ത്യയുടെ അഗ്നി-5 ബാലിസ്റ്റിക് മിസൈൽ രാത്രികാല പരീക്ഷണം വിജയം- Nuclear Capable Agni-V Ballistic Missile Night Trials Successful

ഭുവനേശ്വർ: 5,500 കിലോമീറ്ററിന് മുകളിൽ പ്രഹരശേഷിയുള്ള അഗ്നി-5 ബാലിസ്റ്റിക് മിസൈലിന്റെ രാത്രികാല പരീക്ഷണം വിജയകരമായി പൂർത്തിയാക്കി ഇന്ത്യ. ഒഡിഷ തീരത്തെ അബ്ദുൾ കലാം ദ്വീപിൽ വെച്ച് ഡി ആർ ഡി ഒ വിജയകരമായി പരീക്ഷിച്ച അഗ്നി-5, ആണവ വാഹക ശേഷിയുള്ള മിസൈലാണ്.

നേരത്തേ ഉള്ളതിനേക്കാൾ ഭാരം കുറഞ്ഞ, നൂതന സാങ്കേതിക ഉപകരണങ്ങൾ മിസൈലിൽ ഘടിപ്പിച്ചിരുന്നു. ഇവയുടെ കാര്യക്ഷമതയും ഡി ആർ ഡി ഒ വിജയകരമായി പരീക്ഷിച്ചതായി പ്രതിരോധ വൃത്തങ്ങൾ അറിയിച്ചു. മിസൈലിന്റെ ദൂരപരിധി, ആവശ്യമെങ്കിൽ ഇനിയും വർദ്ധിപ്പിക്കാൻ സാധിക്കുമെന്ന് പരീക്ഷണത്തിലൂടെ ബോദ്ധ്യമായതായി ഐ എസ് ആർ ഒ വ്യക്തമാക്കി.

ബീജിംഗ് അടക്കം ചൈനയെയും പാകിസ്താനെയും നാമാവശേഷമാക്കാൻ ശേഷിയുള്ളതാണ് മിസൈലെന്ന് റിട്ടയേർഡ് ബ്രിഗേഡിയർ ഹേമന്ത് മഹാജൻ ദേശീയ മാദ്ധ്യമത്തോട് പറഞ്ഞു. ചൈനീസ് നിയന്ത്രണത്തിലുള്ള ഏതൊരു ലക്ഷ്യത്തെയും കൃത്യമായി അടയാളപ്പെടുത്താൻ മിസൈലിന് സാധിക്കും. അഥവാ ഒരു ആണവ യുദ്ധത്തിന്റെ സാഹചര്യമുണ്ടായാൽ ചൈനയെ കൃത്യമായി മെരുക്കാൻ അഗ്നി-5 മിസൈലിലൂടെ ഇന്ത്യക്ക് സാധിക്കുമെന്ന് സൈനിക- സാങ്കേതിക വിദഗ്ധർ വിശദീകരിക്കുന്നു.

മണിക്കൂറിൽ 29,401 കിലോമീറ്റർ വരെ വേഗത്തിൽ സഞ്ചരിക്കാൻ അഗ്നി-5ന് സാധിക്കും. വ്യത്യസ്ത യുദ്ധമുഖങ്ങളിലേക്ക് റോഡ് മാർഗം ഇവയെ വിന്യസിക്കാൻ സാധിക്കും. ഇന്ത്യൻ ആയുധ ശേഖരത്തിലെ ശക്തമായ സാന്നിദ്ധ്യമായിരിക്കും അഗ്നി-5 ബാലിസ്റ്റിക് മിസൈൽ.