ബ്യൂണസ് അയേഴ്സ്: ലോകമെമ്പാടുമുള്ള ക്രൈസ്തവ വിശ്വാസികൾ ക്രിസ്തുമസ് ആഘോഷിക്കുകയാണ്. ലോകകപ്പ് നേടിയതിന്റെ തിളക്കത്തിലാണ് അർജന്റീനയിൽ ക്രിസ്തുമസ് ആഘോഷം പൊടിപൊടിക്കുന്നത്. ഫുട്‌ബോൾ പ്രേമികളുടെ പ്രിയതാരമായ എയ്ഞ്ചൽ ഡി മരിയ ആരാധകർക്കായി ക്രിസ്തുമസ് ആശംസകൾ നേർന്നുകഴിഞ്ഞു. കുടുംബത്തോടൊപ്പം ക്രിസ്തുമസ് ആഘോഷിക്കുന്ന അദ്ദേഹം പുത്തൻ ചിത്രങ്ങൾ സമൂഹമാദ്ധ്യമത്തിലൂടെ പങ്കുവച്ചായിരുന്നു ആരാധകർക്ക് ആശംസകൾ അറിയിച്ചത്.
അർജന്റീന ലോകചാമ്പ്യൻമാരായതിന് ശേഷമുള്ള ക്രിസ്തുമസ് ആയതിനാൽ ഇത്തവണത്തെ ആഘോഷത്തിന് ഇരട്ടി മധുരമാണുള്ളതെന്ന് ഡി മരിയ പറയുന്നു. ക്രിസ്തുമസ് ട്രീയ്‌ക്ക് പകരം ഭീമൻ ലോകകപ്പ് ട്രോഫിയാണ് ഡി മരിയ വീട്ടിൽ ഒരുക്കിയത്. ഇതിന്റെ ചിത്രങ്ങൾ ഇൻസ്റ്റഗ്രാമിൽ പോസ്റ്റ് ചെയ്തതിന് ശേഷം അദ്ദേഹം ഇപ്രകാരം കുറിച്ചു. “എല്ലാവർക്കും ക്രിസ്തുമസ് ആശംസകൾ.. പ്രിയപ്പെട്ടവരോടൊപ്പം ശാന്തിയും സമാധാനവും നിറഞ്ഞ ക്രിസ്തുമസ് ആഘോഷിക്കാൻ നിങ്ങൾക്ക് കഴിയട്ടെയെന്ന് ഹൃദയം നിറഞ്ഞ് ആശംസിക്കുന്നു. കഴിഞ്ഞ ദിവസങ്ങളിൽ നിങ്ങളോരോരുത്തരും നൽകിയ സ്‌നേഹത്തിനും പിന്തുണയ്‌ക്കും നന്ദി പറയാനും ഈ അവസരം വിനിയോഗിക്കുകയാണെന്നും” അദ്ദേഹം ഇൻസ്റ്റഗ്രാമിൽ പറഞ്ഞു.
ഭാര്യയും രണ്ട് മക്കളുമടങ്ങുന്നതാണ് ഡി മരിയയുടെ കുടുംബം. അദ്ദേഹത്തിന്റെ ആശംസാ പോസ്റ്റിന് കീഴിൽ ലയണൽ മെസ്സിയും കമന്റ് രേഖപ്പെടുത്തി. മനോഹരമായ കുടുംബം, ക്രിസ്തുമസ് ആശംസകൾ എന്നായിരുന്നു അദ്ദേഹം കുറിച്ചത്.
Comments