ലോകത്തെ മികച്ച ഭക്ഷണം ഏത് രാജ്യത്തേത്?; ഇന്ത്യയുടെ സ്ഥാനമെത്ര..? ഉത്തരമിതാ

വൈവിധ്യങ്ങൾ കൊണ്ട് സമ്പന്നമാണ് ഇന്ത്യ. സംസ്‌കാരത്തിലും ആചാരനുഷ്ഠാനങ്ങളിലും വസ്ത്രധാരണത്തിലും തുടങ്ങി ആഹാരകാര്യങ്ങളിൽ വരെ ഏറെ പ്രത്യേകതകളാണ് ഇന്ത്യയിലുള്ളത്. ലോകത്തിലെ തന്നെ ഏറ്റവും മികച്ച സംഭാവനകൾ നൽകുന്ന രാജ്യവും ഇന്ത്യയാണ്. അത്തരത്തിൽ അമൂല്യമായ നേട്ടം ഇപ്പോൾ സ്വന്തമാക്കിയിരിക്കുകയാണ് രാജ്യം.

ലോകത്തിലെ പാചക രീതികളിൽ അഞ്ചാമത്തെ മികച്ച രീതിയാണ് ഭാരത്തിന്റേത്. പൊതുജനാഭിപ്രായത്തെ അടിസ്ഥാനമാക്കി ലോകമെമ്പാടുമുള്ള ഭക്ഷണങ്ങളുടെ റാങ്ക് ചെയ്യുന്ന വെബ്‌സൈറ്റായ ടേസ്റ്റ് അറ്റ്‌ലസ് പുറത്തുവിട്ട പട്ടിക പ്രകാരമാണ് ഇന്ത്യൻ പാചകരീതിയ്‌ക്ക് അഞ്ചാം സ്ഥാനം ലഭിച്ചത്. 2022-ൽ നടത്തിയ വോട്ടിംഗിനെ സംബന്ധിച്ചാണ് പട്ടിക പുറത്തുവിട്ടിരിക്കുന്നത്.

പട്ടികയിൽ ഇറ്റാലിയൻ പാചകരീതി ലോകത്ത് ഒന്നാം സ്ഥാനത്തും ഗ്രീസും സ്പെയിനും രണ്ടും മൂന്നും സ്ഥാനങ്ങൾ നേടി. ജാപ്പനീസ് പാചകരീതി നാലാം സ്ഥാനത്തെത്തി. മികച്ച പാചക രീതി പിന്തുടരുന്ന 97 രാജ്യങ്ങളുടെ പട്ടികയാണ് ടേസ്റ്റ് അറ്റലസ് പുറത്തുവിട്ടത്. 5-ൽ 4.54 സ്‌കോർ നേടിയാണ് ഇന്ത്യൻ പാചക രീതി അഞ്ചാം സ്ഥാനമുറപ്പിച്ചത്. ചേരുവകൾ, ഉപയോഗിക്കുന്ന മറ്റ സാധാനങ്ങൾ, പാനീയങ്ങൾ എന്നിവയെ അടിസ്ഥാനപ്പെടുത്തിയാണ് വോട്ടിംഗ് നടത്തിയത്.

നെയ്യ്, മലായ്, ബട്ടർ ഗാർലിക് നാൻ, ഗരം മസാല, കീമ എന്നിവ 2022-ൽ ഇന്ത്യയിലെ ഏറ്റവും മികച്ച റേറ്റുചെയ്ത ഭക്ഷണങ്ങളാണ്. ആകെ 465 ഇന്ത്യൻ ഭക്ഷണങ്ങളാണ് പട്ടികയിൽ ഉൾപ്പെട്ടിട്ടുള്ളത്. പായസം, പാനീയങ്ങൾ, ലഘുഭക്ഷണങ്ങൾ, മധുരപലഹാരങ്ങൾ തുടങ്ങിയവയും ഉൾപ്പെടുന്നു. മികച്ച ഇന്ത്യൻ ഭക്ഷണങ്ങൾ വിൽക്കുന്ന 464 റെസ്റ്റോറന്റുകളുടെ പട്ടികയും വെബ്‌സൈറ്റ് പുറത്തുവിട്ടിട്ടുണ്ട്. മുംബൈയിലെ ശ്രീ താക്കർ ഭോജനലെ, ബംഗളൂരുവിലെ കാരവല്ലി, ഡൽഹിയിലെ ബുഖാറ, ദം പുഖ്ത്, ഗുരുഗ്രാമിലെ കൊമോറിൻ എന്നിവയാണ് മികച്ച റെസ്‌റ്റോറന്റുകളുടെ പട്ടികയിൽ ആദ്യ സ്ഥാനങ്ങളിലുള്ളത്. tasteatlas.com/best/cusines എന്ന് വെബ്‌സൈറ്റിലൂടെയാണ് പട്ടിക പുറത്തുവിട്ടത്.