ഗുവാഹട്ടി: ഫേസ്ബുക്ക് ലൈവിൽ വന്ന് യുവാവ് ജീവനൊടുക്കി. പ്രണയിനി വിവാഹ വാഗ്ദാനം നിരസിച്ചുവെന്ന് ചൂണ്ടിക്കാട്ടിയാണ് യുവാവിന്റെ ആത്മഹത്യ. അസമിലെ സിൽച്ചാറിലാണ് സംഭവം. 27-കാരനായ ജയ്ദീപ് റോയ് ആണ് മരിച്ചത്. മെഡിക്കൽ സെയിൽസ് പ്രൊഫഷണലായിരുന്നു ജയ്ദീപ്. ഫേസ്ബുക്കിൽ ലൈവിൽ വന്ന ശേഷം വാടകവീട്ടിലെ മുറിയിൽ വച്ച് യുവാവ് തൂങ്ങിമരിക്കുകയായിരുന്നു. സംഭവത്തിൽ പോലീസ് അന്വേഷണമാരംഭിച്ചു.
വിവാഹ ആലോചനയുമായി അവളുടെ അടുത്തേക്ക് ചെന്നതാണ്. എന്നാൽ എല്ലാവരുടെയും മുമ്പിൽ വച്ച് അവളെന്നെ തിരസ്കരിച്ചു. ഇതിന് ശേഷം അവളുടെ അമ്മാവൻ തന്നെ ഭീഷണിപ്പെടുത്തി. ഈ ബന്ധം തുടർന്നാൽ അവളെ കൊല്ലുമെന്നായിരുന്നു ഭീഷണി. ഇനി ഈ ലോകത്തോട് വിട പറയുകയാണ്. താൻ കാരണം അവൾ ഇനി ദുരിതം അനുഭവിക്കേണ്ട. അമ്മയും പെങ്ങളും സഹോദരനും തന്നോട് ക്ഷമിക്കണം. നിങ്ങളെല്ലാവരെയും ഒരുപാട് സ്നേഹിക്കുന്നു. എങ്കിലും തന്റെ പ്രണയിനിയെ അതിലേറെ ഇഷ്ടപ്പെടുന്നു. അവളില്ലാതെ തനിക്ക് ജീവിക്കാൻ കഴിയില്ലെന്നും ജയ്ദീപ് പറഞ്ഞു. ശേഷം ഇയാൾ ജീവനൊടുക്കുകയായിരുന്നു.
സംഭവമറിഞ്ഞ ജയ്ദീപിന്റെ വീട്ടുകാർ ഏറെ നേരത്തിന് ശേഷമാണ് ഞെട്ടലിൽ നിന്ന് മുക്തരായത്. എന്താണ് സംഭവിച്ചതെന്നോ എന്തു ചെയ്യണമെന്നോ തങ്ങൾക്ക് അറിയില്ലെന്നായിരുന്നു കുടുംബത്തിന്റെ പ്രതികരണം. കാമുകിയുടെ കുടുംബത്തിന്റെ പെരുമാറ്റമാണ് ജയ്ദീപിനെ ആത്മഹത്യയിലേക്ക് നയിച്ചതെന്നും യുവതിയുടെ കുടുംബത്തിനെതിരെ നിയമപരമായി മുന്നോട്ടുപോകുമെന്നും വീട്ടുകാർ പറഞ്ഞു.
