ഡൽഹി: കോണ്ഗ്രസിലേക്ക് മടങ്ങി വരുന്നു എന്ന വാർത്ത തള്ളി മുൻ കോൺഗ്രസ് നേതാവ് ഗുലാം നബി ആസാദ്. വാർത്ത തന്നെ ഞെട്ടിച്ചെന്നും കോൺഗ്രസിലെ ഒരുവിഭാഗം നേതാക്കൾ പടച്ചുവിടുന്ന വെറും കള്ളക്കഥകൾ മാത്രമാണിതെന്നും അദ്ദേഹം ട്വിറ്ററിലൂടെ പ്രതികരിച്ചു. വാർത്താ ഏജൻസിയായ എഎൻഐ-യാണ് കോൺഗ്രസിലേയ്ക്ക് ഗുലാം നബി ആസാദ് തിരിച്ചു വരുന്നു എന്ന വാർത്ത നൽകിയത്.
‘ഞാൻ കോൺഗ്രസിലേക്കു തിരിച്ചുപോകുന്നു എന്നുള്ള എഎൻഐയുടെ വാർത്ത എന്ന ഞെട്ടിച്ചു. എന്നെ പിന്തുണയ്ക്കുന്നവരുടെയും
പാർട്ടിയിലെ നേതാക്കളുടെയും മനോവീര്യം തകർക്കാനായി കോൺഗ്രസിലെ ഒരു വിഭാഗം നേതാക്കൾ പടച്ചു വിടുന്ന വെറും കള്ളക്കഥകളാണിത്. കോൺഗ്രസ് പാർട്ടിയോടോ അതിന്റെ നേതൃത്വത്തോടോ യാതൊരു വിരോധവുമില്ല. എന്നാൽ, ഇത്തരത്തിൽ കഥകൾ മെനയുന്നവർ അതിൽ നിന്നും പിന്മാറണമെന്ന് അഭ്യർഥിക്കുന്നു’ എന്നാണ് ഗുലാം നബി ആസാദ് ട്വിറ്ററിൽ കുറിച്ചത്.
നാലു മാസം മുമ്പാണ് പാർട്ടിക്കെതിരെയും രാഹുൽ ഗാന്ധിക്കെതിരെയും തുറന്നടിച്ചുകൊണ്ട് ഗുലാം നബി ആസാദ് കോൺഗ്രസ് വിട്ടത്. ജമ്മു കശ്മീർ കേന്ദ്രീകരിച്ച് ഡെമോക്രാറ്റിക് ആസാദ് പാർട്ടി എന്ന പുതിയ പാർട്ടിയും അദ്ദേഹം രൂപീകരിച്ചു. എന്നാൽ പാർട്ടിക്ക് വേണ്ടത്ര ശ്രദ്ധ പിടിച്ചു പറ്റാൻ കഴിയാത്തതിനാൽ കോൺഗ്രസിലേയ്ക്ക് ആസാദ് തിരിച്ചു വരുന്നു എന്നാണ് വാർത്തകൾ പുറത്തു വന്നത്.
Comments