‘ഈ അവതാരം തുടർന്നാൽ 2024ൽ രാജ്യത്ത് ഭരണമാറ്റം ഉണ്ടാകും‘: രാഹുൽ ഗാന്ധിയുടെ താടിരോമങ്ങളെ പ്രശംസിച്ച് സഞ്ജയ് റാവത്ത്

മുംബൈ: രാഹുൽ ഗാന്ധിയുടെ താടി വളർത്തിയ രൂപത്തെ പ്രശംസിച്ച് ശിവസേന ഉദ്ധവ് പക്ഷ നേതാവ് സഞ്ജയ് റാവത്ത്. സാമ്നയിലെ പ്രതിവാര പംക്തിയിലാണ് രാഹുൽ ഗാന്ധിയെയും കോൺഗ്രസിനെയും ഭാരത് ജോഡോ യാത്രയെയും പ്രശംസിച്ച് റാവത്ത് രംഗത്ത് വന്നത്.

ഡൽഹിയിലെ കൊടും തണുപ്പിൽ ടീഷർട്ട് ധരിച്ചാണ് രാഹുൽ യാത്ര ചെയ്യുന്നത്. 2022ൽ കണ്ടത് രാഹുൽ ഗാന്ധിയുടെ പുതിയ അവതാരമാണ്. രാഹുൽ ഈ അവതാരം തുടർന്നാൽ 2024ൽ രാജ്യത്ത് ഭരണമാറ്റം ഉണ്ടാകും. താടിവെച്ച രാഹുലിന്റെ ചിത്രം പങ്കുവെച്ച് റാവത്ത് കുറിച്ചു.

2024 ലോക്സഭാ തിരഞ്ഞെടുപ്പിലെ പ്രതിപക്ഷത്തിന്റെ പ്രധാനമന്ത്രി സ്ഥാനാർത്ഥി രാഹുൽ ഗാന്ധി ആയിരിക്കും എന്ന് മദ്ധ്യപ്രദേശ് മുൻ മുഖ്യമന്ത്രി കമൽനാഥ് കഴിഞ്ഞ ദിവസം പറഞ്ഞിരുന്നു. ഇതിന് പിന്നാലെയാണ് രാഹുലിനെ പ്രശംസിച്ച് സഞ്ജയ് റാവത്ത് രംഗത്ത് വന്നത്.

അതിനിടെ, പ്രതിപക്ഷം ഒരുമിച്ച് നിന്നാൽ 2024ൽ ബിജെപിയെ പരാജയപ്പെടുത്താൻ കഴിയുമെന്ന് രാഹുൽ ഗാന്ധി കഴിഞ്ഞ ദിവസം പറഞ്ഞിരുന്നു. ഇത് കോൺഗ്രസിന്റെ കഴിവുകേടാണെന്ന് രാഷ്‌ട്രീയ നിരീക്ഷകർ പരിഹസിച്ചിരുന്നു. കോൺഗ്രസ് ഒറ്റയ്‌ക്ക് ഇപ്പോഴേ തോൽവി സമ്മതിച്ചതിന്റെ ഉദാഹരണമായും ഈ പ്രസ്താവന വ്യാഖ്യാനം ചെയ്യപ്പെട്ടിരുന്നു.