പഴങ്ങളിൽ ഭൂരിഭാഗം ആളുകൾക്കും ഇഷ്ടമുള്ളതാണ് ഓറഞ്ച്.മണം കൊണ്ടും രുചി കൊണ്ടും പ്രിയപ്പെട്ടതാണ് ഓറഞ്ച്. സിട്രസ് വിഭാഗത്തിലുള്ള പഴമാണ് ഓറഞ്ച്. വിറ്റാമിൻ സിയുടെ കലവറയാണ് ഓറഞ്ച്. ഇതിൽ ആന്റി ഓക്സിഡന്റുകളും നാരുകളും ധാരാളം അടങ്ങിയിട്ടുണ്ട് .
ഓറഞ്ച് കഴിച്ച് കഴിഞ്ഞാൽ തൊലി തൊടിയിലേക്ക് വലിച്ചെറിയുന്നതാണല്ലോ പതിവ്. എന്നാൽ ഓറഞ്ചിന്റെ അതേ ഗുണങ്ങൾ തന്നെയാണ് ഓറഞ്ച് തൊലിയും നൽകുന്നത്. സൗന്ദര്യത്തിനും ആരോഗ്യത്തിനും തുടങ്ങി മികച്ച കീടനാശിനി ആയി വരെ ഓറഞ്ച് തൊലി ഉപയോഗിക്കാവുന്നതാണ്. ഓറഞ്ച് തൊലിയിൽ നിന്നുണ്ടാക്കുന്ന വളവും കീടനാശിനിയും വിളകളെ ബാധിക്കുന്ന വണ്ട്, ഉറുമ്പുകൾ, ഈച്ച, മറ്റ് പ്രാണികൾ എന്നിവയ്ക്കെതിരെ പ്രവർത്തിക്കുന്നു. ചെടികൾക്ക് ആവശ്യമായ പോഷകങ്ങളും ഓറഞ്ച് തൊലിയിലുണ്ട്. നൈട്രജൻ, ഫോസ്ഫറസ്, പൊട്ടാസ്യം, സോഡിയം, കാൽസ്യം തുടങ്ങിയ പോഷകങ്ങൾ ഇതിലുണ്ട്.
ചർമ സംരക്ഷണത്തിലും ഒഴിച്ചുകൂടാനാകാത്ത ഒന്നാണ് ഓറഞ്ചും ഓറഞ്ച് തൊലിയും. ചർമ്മത്തിന്റെ അഴകിനും ആരോഗ്യത്തിനും ഓറഞ്ച് ജ്യൂസ് പതിവാക്കുന്നത് ഗുണം ചെയ്യും. മുഖക്കുരുവിനെ അകറ്റാനും കറുത്തപാടുകളെ നീക്കം ചെയ്യാനും എണ്ണമയമുള്ള ചർമ്മത്തിനും മികച്ച പരിഹാരമാണ് ഓറഞ്ച് തൊലി. ഇതിനായി ഓറഞ്ചിന്റെ തൊലി ഉണക്കി പൊടിക്കുകയാണ് വേണ്ടത്. പൊടിച്ചെടുത്ത തൊലി അടച്ചുറപ്പുള്ള ഇറുകിയ പാത്രത്തിൽ സൂക്ഷിച്ച് വെക്കാവുന്നതാണ്. ഓറഞ്ച് തൊലിയ്ക്കൊപ്പം ചേർത്ത് പല തരത്തിലുള്ള ഫേസ്പാക്കുകൾ ഉണ്ടാക്കാവുന്നനതാണ്.
* ചർമം തിളങ്ങാനായി മൂന്ന് ടീസ്പൂൺ പൊടിച്ച ഓറഞ്ച് തൊലി എടുക്കുക. അതിലേക്ക് രണ്ട് ടീസ്പൂൺ പഞ്ചസാരയും തേങ്ങാപ്പാലും ചേർത്ത് പേസ്റ്റ് രൂപത്തിലാക്കി മുഖത്ത് പുരട്ടുക. 15 മിനിറ്റിന് ശേഷം തണുത്ത വെള്ളത്തിൽ കഴുകി കളയാവുന്നതാണ്.
* ഒരു സ്പൂൺ ഓറഞ്ച് തൊലി ഉണക്കി പൊടിച്ചതിനൊപ്പം രണ്ട് സ്പൂൺ തൈര് ചേർത്ത് മുഖത്ത് പുരട്ടാവുന്നതാണ്. 20 മിനിറ്റിന് ശേഷം കഴുകി കളയുക. ഇങ്ങനെ ചെയ്യുന്നത് വഴി മുഖത്തെ ചുളിവുകളെ അകറ്റാനും കരുവാളിപ്പിനെ ഇല്ലാതാക്കാനും സഹായിക്കും.
* ഓറഞ്ച് തൊലി പൊടിച്ചത്, ഒരു സ്പൂൺ ഓട്സ്, ഒരു ടീസ്പൂൺ ബേക്കിംഗ് സോഡ എന്നിവ യോജിപ്പിച്ച് മുഖത്ത് നന്നായി മസാജ് ചെയ്യുക. 30 മിനിറ്റിന് ശേഷം മുഖം കഴുകാവുന്നതാണ്. ആഴ്ചയിൽ രണ്ട് തവണ എങ്ങനെ ചെയ്യുന്നത് മുഖക്കുരുവിനെ പ്രതിരോധിക്കാൻ സഹായിക്കും.
* മുഖം വെയിലേറ്റ് മങ്ങിയോ? വിഷമിക്കേണ്ട കുറച്ച് ഓറഞ്ച് ഉണക്കി പൊടിച്ചതിനൊപ്പം ഒരു നുള്ള് മഞ്ഞപ്പൊടിയും ഒരു സ്പൂൺ തേനും ചേർത്ത് കുഴമ്പ് രൂപത്തിലാക്കി മുഖത്തും കഴുത്തിലും തേച്ചുപിടിപ്പിക്കുക. പത്ത് മിനിറ്റ് റോസ് വാട്ടർ ഉപയോഗിച്ച് കഴുകി കളയുക. ആഴ്ചയിൽ രണ്ട് തവണ ഇത്തരത്തിൽ ഉപയോഗിക്കാവുന്നതാണ്.
Comments