ശ്രീനഗർ: സിആർപിഎഫ് വാഹനത്തിന് നേരെ ഗ്രനേഡ് ആക്രമണം. ശ്രീനഗറിലെ എംകെ ചൗക്കിലാണ് സംഭവം. ആക്രമണത്തിൽ പ്രദേശവാസിയായ കുട്ടിക്ക് പരിക്കേറ്റിട്ടുണ്ട്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. കൂടുതൽ വിവരങ്ങൾ പുറത്തുവരാനുണ്ടെന്ന് പോലീസ് അറിയിച്ചു.
കഴിഞ്ഞ ദിവസം ജമ്മുവിലെ രജൗരി ജില്ലയിൽ ഭീകരാക്രമണം നടന്നതിന് പിന്നാലെയാണ് സംഭവം. രജൗരി ജില്ലയിലെ ഗ്രാമത്തിൽ തോക്കുമായെത്തിയാണ് ഭീകരർ സാധാരണക്കാർക്ക് നേരെ വെടിയുതിർത്തത്. സംഭവത്തിൽ മൂന്ന് പ്രദേശവാസികൾ കൊല്ലപ്പെടുകയും ഒമ്പത് പേർക്ക് പരിക്കേൽക്കുകയും ചെയ്തു. രണ്ട് പേരുടെ നില അതീവ ഗുരുതരമായി തുടരുകയാണ്.
കഴിഞ്ഞ നവംബർ 13-ന് ഉണ്ടായ വെടിവെപ്പിൽ രണ്ട് വിവിധ ഭാഷ തൊളിലാളികൾക്ക് പരിക്കേറ്റിരുന്നു. നവംബർ 3-ന് അനന്ത്നാഗിലെ സ്വകാര്യ സ്കൂളിൽ ജോലി ചെയ്യുന്ന രണ്ട് പേർക്ക് നേരെയും ആക്രമണം നടന്നിരുന്നു. ബീഹാർ, നേപ്പാൾ എന്നിവിടങ്ങളിൽ നിന്നുള്ളവരാണ് ആക്രമണത്തിന് ഇരയായത്. ഒക്ടോബർ 18-ന് നടന്ന ഗ്രനേഡ് ആക്രമണത്തിൽ ഉത്തർപ്രദേശിലെ കനൗജിൽ നിന്നുള്ള രണ്ട് തൊഴിലാളികൾ കൊല്ലപ്പെട്ടിരുന്നു. ഷോപ്പിയാൻ ജില്ലയിലായിരുന്നു ഭീകരർ ആക്രമണം നടത്തിയത്.
