തിരുവനന്തപുരം: സ്കൂൾ ബസിൽ പോയ കുട്ടികൾ എവിടെ വരെയെത്തിയെന്ന് അറിയാതെ മാതാപിതാക്കൾ ഇനി വിഷമിക്കേണ്ട. അവരുടെ ബസ് ട്രാക്ക് ചെയ്യാൻ മോട്ടോർ വാഹന വകുപ്പിന്റെ പുതിയ സംവിധാനം തയ്യാർ. സ്കൂൾ ബസ് എവിടെയെത്തിയെന്നും ബസ് എത്ര വേഗത്തിലാണ് സഞ്ചരിക്കുന്നത് എന്നും അറിയാനുള്ള സംവിധാനമാണ് തയ്യാറാക്കിയിരിക്കുന്നത്.
വിദ്യ വാഹൻ എന്ന മൊബൈൽ ആപ്ലിക്കേഷനിലൂടെയാണ് സ്കൂൾ ബസ് ട്രാക്ക് ചെയ്യാനാകുക. കൂടാതെ അടിയന്തിര സാഹചര്യങ്ങളിൽ സ്കൂൾ ബസ് ഡ്രൈവറെ വിളിക്കാനും ആപ്പിൽ സൗകര്യമുണ്ട്. മോട്ടോർ വാഹന വകുപ്പിന്റെ സുരക്ഷാ മിത്ര എന്ന പ്ലാറ്റ്ഫോം അടിസ്ഥാനമാക്കിയുള്ളതാണ് വിദ്യ വാഹൻ.
ആപ്ലിക്കേഷൻ ഉപയോഗിക്കുന്നതിനായി രക്ഷിതാക്കൾ മൊബൈൽ നമ്പർ രജിസ്റ്റർ ചെയ്യണം. സ്കൂൾ അധികൃതരുമായി ബന്ധപ്പെട്ട് ഇതു ചെയ്യാമെന്നും മോട്ടോർ വാഹന വകുപ്പ് അറിയിച്ചു. സംശയങ്ങൾക്ക് ടോൾ ഫ്രീ നമ്പറായ 1800 599 7099.
