കൊല്ലം: അതിര്‍ത്തിയില്‍ മായം ചേര്‍ത്ത പാല്‍ പിടികൂടി ഭക്ഷ്യസുരക്ഷാ വിഭാഗം. ഹൈഡ്രജന്‍ പെറോക്സൈഡ് കലര്‍ത്തിയ 15,300 ലിറ്റര്‍ പാലാണ് കൊല്ലം ആര്യങ്കാവ് ചെക്ക്പോസ്റ്റില് പിടികൂടിയത്. തമിഴ്നാട്ടില് നിന്നും കേരളത്തിലേക്ക് കൊണ്ടുവന്ന പാലിലാണ് മായം ചേര്‍ത്തതായി കണ്ടെത്തിയത്.
ആര്യങ്കാവ് ചെക്ക്പോസ്റ്റില് നടത്തിയ റാപ്പിഡ് പരിശോധയിലാണ് പാലില്‍ മായം കലര്‍ത്തിയതായി കണ്ടെത്തിയത്. തമിഴ്‌നാട്ടിലെ തെങ്കാശിയില്‍ നിന്നും പത്തനംതിട്ടയിലെ പന്തളത്തേക്ക് കൊണ്ടുപോകുകയായിരുന്നു പാല്‍. തുടര്‍ന്ന് ഭക്ഷ്യസുരക്ഷാ വിഭാഗം നടത്തിയ പ്രാഥമിക പരിശോധനയിലാണ് പാലില്‍ കലര്‍ത്തിയത് ഹൈഡ്രജന്‍ പെറോക്സൈഡാണെന്ന് കണ്ടെത്തിയത്. പാലിന്റെ സാമ്പിള്‍ തിരുവനന്തപുരത്തെ അനലറ്റിക്കല്‍ ലാബിലേക്ക് പരിശോധനയ്‌ക്ക് അയച്ചു.
പാലില്‍ എത്രത്തോളം ഹൈഡ്രജന്‍ പെറോക്സൈഡ് കലര്‍ത്തിയിട്ടുണെന്നത് വ്യക്തമല്ല. അതിനാല്‍ തിരുവനന്തപുരത്ത് നിന്നും വിശദ പരിശോധന റിപ്പോര്‍ട്ട് ലഭിച്ച ശേഷമാകും തുടര്‍ നിയമനടപടികള്‍ സ്വീകരിക്കുകയെന്ന് ഭക്ഷ്യസുരക്ഷാ വിഭാഗം അറിയിച്ചിട്ടുണ്ട്. സംഭവത്തില്‍ അടിയന്തരമായി റിപ്പോര്‍ട്ട് നല്‍കാന്‍ ജില്ലാ ഭക്ഷ്യസുരക്ഷാ ഓഫീസര്‍ ആവശ്യപ്പെട്ടിട്ടുണ്ട്. മായം ചേര്‍ത്ത ഭക്ഷണം ഹോട്ടലുകളിലും മറ്റും ഉപയോഗിക്കുന്നത് വ്യാപകമാണെന്ന് ലഭിച്ച വിവരത്തിന്റെ അടിസ്ഥാനത്തിലാണ് അതിര്‍ത്തിയില്‍ പരിശോധന നടത്തിയത്.
Comments