എന്തുകൊണ്ടാണ് നമ്മൾ കോട്ടുവായ ഇടുന്നത് എന്ന് ചോദിച്ചാൽ പലരും പല ഉത്തരങ്ങളാണ് പറയുക. ഉറക്കം വരുന്നതിന്റെ ലക്ഷണമാണെന്ന് ചിലർ പറയും. അലസതയും മടിയും ഉള്ളതുകൊണ്ടാണെന്ന് മറ്റ് ചിലർ പറയും. താല്പര്യമില്ലായ്മയെ സൂചിപ്പിക്കുന്നതാണ് കോട്ടുവായ എന്നും പറയും. ഒരു ചോദ്യത്തിന് ഒരുപാട് ഉത്തരങ്ങൾ. ഒരു ദിവസം ശരാശരി 5 മുതൽ 10 തവണ വരെ മനുഷ്യർ കോട്ടുവായ ഇടാറുണ്ട്. എന്നാൽ ചിലർ ഒരു ദിവസം 100 തവണ വരെ കോട്ടുവായ ഇടുന്നതായി പഠനങ്ങൾ പറയുന്നു. സാധാരണ ഉറങ്ങുന്നതിനപ്പുറം സമയം ഉണർന്നിരുന്നാൽ ഇത്തരത്തിൽ തുടരെ തുടരെ കോട്ടുവായ ഇട്ടേക്കാം. അമിതമായി കോട്ടുവായ ഇടുകയാണെങ്കിൽ, അത് ഉറക്കമോ ന്യൂറോളജിക്കൽ ഡിസോർഡറോ മറ്റ് ആരോഗ്യപ്രശ്നങ്ങളോ മൂലമുണ്ടാകുന്ന ഉറക്കക്കുറവിനെ സൂചിപ്പിക്കാം. നിങ്ങൾക്ക് അമിതമായി ക്ഷീണം, സമ്മർദ്ദം അല്ലെങ്കിൽ വിഷാദം അല്ലെങ്കിൽ ഉത്കണ്ഠ എന്നിവ ഉണ്ട് എന്നതും ഇത് സൂചിപ്പിക്കുന്നു.
വയറ്റിനെയും ഹൃദയത്തെയും തലച്ചോറുമായി ബന്ധിപ്പിക്കുന്ന വാഗസ് നാഡിയുടെ ന്യൂറോളജിക്കൽ പ്രതികരണമാണ് കോട്ടുവായ. വിരസതയോ താൽപ്പര്യക്കുറവോ പോലെ ലളിതമായ കാര്യങ്ങൾക്കൊണ്ടും ഉത്കണ്ഠയോ വിഷാദമോ പോലെയുള്ള മാനസിക പ്രശ്നങ്ങൾ, ഉറക്കക്കുറവ് എന്നിവ കൊണ്ടും കോട്ടുവായ ഇടാറുണ്ട്. കൂടാതെ, രക്തത്തിലെ പഞ്ചസാരയുടെ കുറവ്, അപസ്മാരം, മൾട്ടിപ്പിൾ സ്ക്ലിറോസിസ് പോലുള്ള നാഡീസംബന്ധമായ രോഗങ്ങൾ, അപൂർവ്വമായി ഗട്ട് രക്തസ്രാവം, ലിവർ സിറോസിസ് അല്ലെങ്കിൽ രക്തസമ്മർദ്ദം കുറയുന്നതിന് കാരണമാകുന്ന ഹൃദയ സംബന്ധമായ അസുഖങ്ങൾ എന്നിവയും കാരണങ്ങളിൽ ഉൾപ്പെടാം.
വിട്ടുമാറാത്ത കരൾ രോഗമുള്ള രോഗികളിൽ ഉണ്ടാകുന്ന ഹെപ്പാറ്റിക് എൻസെഫലോപ്പതി പോലുള്ള ഉപാപചയ രോഗങ്ങളുടെ ഒരു അടയാളം കൂടിയാണ് കോട്ടുവായ. അപസ്മാരം ഉള്ളവരിൽ ഇത് സംഭവിക്കാം. തലച്ചോറിലെ ചില ഭാഗങ്ങളിൽ താപനില നിയന്ത്രണം ശരിയായ പാതയിൽ ആയിരിക്കില്ല. ശരീര താപനില കൂടുതലാണെങ്കിൽ തലച്ചോറിന്റെ താപനില കൂടുതലാണ്. ഈ സമയങ്ങളിൽ നാം കോട്ടുവായ ഇടുന്നു. വിട്ടുമാറാത്ത വൃക്കരോഗം പോലുള്ള ചില അവസ്ഥകളും കോട്ടുവായക്ക് കാരണമാകുന്നുണ്ട്. അതിനാൽ തന്നെ കോട്ടുവായ എന്നത് പലപ്പോഴും ഉറക്കത്തിന്റെ മാത്രം പ്രശ്നമല്ല, മറ്റ് പല വൈകല്യങ്ങളുടെയും ലക്ഷണം കൂടിയാണ്. അമിതമായി കോട്ടുവായ ഇടുന്നവരാണെങ്കിൽ ഒരു സ്ലീപ്പ് ഡിസോർഡർ സ്പെഷ്യലിസ്റ്റിനെ കാണുന്നത് നല്ലതായിരിക്കും.
