ഞെട്ടിച്ചുകളഞ്ഞു! പ്രധാനമന്ത്രിയ്‌ക്ക് നന്ദിയും പ്രശംസയും അറിയിച്ച് സിദ്ധാർത്ഥ് മൽഹോത്ര

ന്യൂഡൽഹി: പ്രധാനമന്ത്രി നരേന്ദ്ര മോദി ആൻഡമാൻ നിക്കോബാറിലെ ദ്വീപുകൾക്ക് പരം വീർ ചക്ര പുരസ്‌കാര ജേതാക്കളുടെ പേരുകൾ നൽകിയതിനെ വാനോളം പുകഴ്‌ത്തി ബോളിവുഡ് നടൻ സിദ്ധാർത്ഥ് മൽഹോത്ര. ട്വിറ്ററിലൂടെയാണ് താരം പ്രതികരിച്ചത്

”ആൻഡമാൻ നിക്കോബാറിലെ ഒരു ദ്വീപിന് നമ്മുടെ നായകൻ ക്യാപ്റ്റൻ വിക്രം ബത്രയുടെ പേരിട്ടിരിക്കുന്നു എന്ന വാർത്ത എന്നെ ഞെട്ടിച്ചുകളഞ്ഞു! എന്നാണ് സിദ്ധാർത്ഥ് ട്വീറ്റ് ചെയ്തിരിക്കുന്നത്. സ്‌ക്രീനിൽ അദ്ദേഹത്തിന്റെ റോൾ ചെയ്യാൻ ഭാഗ്യമുണ്ടായതിൽ അഭിമാനിക്കുന്നു. പ്രധാനമന്ത്രി നരേന്ദ്രമോദിയുടെ ഈ തീരുമാനം ഷേർഷാ എന്നേക്കും ജീവിക്കുന്നുവെന്ന് ഉറപ്പാക്കുന്നു എന്നും സിദ്ധാർത്ഥ് ട്വിറ്ററിൽ കുറിച്ചു.

The very news that an island in Andaman & Nicobar is named after our hero Capt. Vikram Batra leaves me with goosebumps!

My heart swells with pride that I was fortunate to live his role on screen. This step taken by PM @narendramodi ensures that Shershaah lives on forever.

— Sidharth Malhotra (@SidMalhotra) January 23, 2023

2021 ആഗസ്റ്റ് 12-ന് റിലീസ് ചെയ്ത ഷേർഷാ സിനിമയിൽ ക്യാപ്റ്റൻ വിക്രം ബത്രയായി സിദ്ധാർത്ഥ് ആണ് അഭിനയിച്ചത്. കാർഗിൽ യുദ്ധത്തിൽ വീരോചിതമായ പോരാട്ടം നടത്തിയ വിക്രം ബത്രയ്‌ക്ക് മരണാനന്തരബഹുമതിയായി പരം വീർ ചക്ര ലഭിച്ചിരുന്നു

സിദ്ധാർത്ഥ് മൽഹോത്രയ്‌ക്ക് പുറമേ ബോളിവുഡ് താരങ്ങളായ അജയ് ദേവ്ഗൺ, സുനിൽ ഷെട്ടി, അനുപം ഖേർ തുടങ്ങിയവരും പ്രധാനമന്ത്രിയുടെ ഈ തീരുമാനത്തെ പ്രശംസിക്കുകയും അദ്ദേഹത്തിന് നന്ദി അറിയിക്കുകയും ചെയ്തുകൊണ്ട് ട്വിറ്ററിലൂടെ പ്രതികരിച്ചു.

ആൻഡമാൻ നിക്കോബാറിലെ 21 ദ്വീപുകളുടെ പേര് പുനർനാമകരണം ചെയ്തതിൽ അഭിമാനിക്കുന്നുവെന്ന് സുനിൽ ഷെട്ടി പ്രതികരിച്ചു. ഈ തീരുമാനം തലമുറകൾക്ക് പ്രചോദനമാകുമെന്ന് അജയ് ദേവ്ഗൺ പറഞ്ഞു. പരമോന്നത ത്യാഗം സഹിച്ച യോദ്ധാക്കൾക്ക് എത്ര ഉചിതമായ ആദരാഞ്ജലി എന്നാണ് അനുപം ഖേർ കുറിച്ചത്.

അതേസമയം നേതാജി സുഭാഷ് ചന്ദ്രബോസ് ദ്വീപിൽ നിർമ്മിച്ച അദ്ദേഹത്തിന്റെ സ്മാരകവും പ്രധാനമന്ത്രി അനച്ഛാദനം ചെയ്തു. ആൻഡമാൻ നിക്കോബാർ ദ്വീപുകളുടെ ചരിത്ര പ്രധാന്യവും നേതാജിയുടെ സ്മരണയും കണക്കിലെടുത്ത് 2018-ൽ പ്രധാനമന്ത്രി സന്ദർശനം നടത്തിയിരുന്നു. ഈ അവസരത്തിൽ റോസ് ദ്വീപിനെ നേതാജി സുഭാഷ് ചന്ദ്ര ബോസ് ദ്വീപ് എന്ന് പുനർനാമകരണം ചെയ്യുകയായിരുന്നു.