കാർ അപകടത്തിൽ പരിക്കേറ്റ് ചികിത്സയിൽ കഴിയുന്ന ഋഷഭ് പന്തിന്റെ തിരിച്ചുവരവിനായി മഹാകാലേശ്വറിന് മുന്നിൽ പ്രാർത്ഥനയൊടെ ഇന്ത്യൻ ക്രിക്കറ്റ് താരങ്ങൾ. ക്രിക്കറ്റ് താരങ്ങളായ സൂര്യകുമാർ യാദവ്, വാഷിങ്ടൺ സുന്ദർ, കുൽദീപ് യാദവ് എന്നിവരാണ് ഉജ്ജയിനിയിലെ പ്രശസ്തമായ മഹാകാലേശ്വർ ക്ഷേത്രത്തിൽ എത്തിയത്.
ഋഷഭ് പന്തിന്റെ ആരോഗ്യത്തിനായി പ്രാർത്ഥിക്കാനാണ് ക്ഷേത്രത്തിൽ എത്തിയതെന്ന് സൂര്യകുമാർ യാദവ് പറഞ്ഞു. തങ്ങളെ സംബന്ധിച്ച് ഋഷഭിന്റെ തിരിച്ചു വരവ് അത്രത്തോളം പ്രധാനപ്പെട്ടതാണെന്നും സൂര്യകുമാർ കൂട്ടിച്ചേർത്തു. പ്രാർത്ഥനയ്ക്ക് ശേഷം ബാബ മഹാകാൽ ഭസ്മ ആരതിയിലും താരങ്ങൾ പങ്കെടുത്തു.
ഇന്ത്യ- ന്യൂസിലൻഡ് മൂന്നാം ഏകദിന മത്സരത്തിന് മുന്നോടിയായി ഇൻഡോറിൽ എത്തിയതായിരുന്നു താരങ്ങൾ. മത്സരം നാളെ നടക്കും. രണ്ട് മത്സരം വിജയിച്ച ഇന്ത്യ പരമ്പര നേടാനുള്ള ശ്രമങ്ങളിലാണ്.
കഴിഞ്ഞമാസമാണ് ഋഷഭ് പന്തിന് കാർ അപകടത്തിൽ പരിക്കേറ്റത്. റൂർക്കിയിലെ വീട്ടിലേയ്ക്ക് പോകും വഴിയാണ് വാഹനാപകടമുണ്ടായത്. ഋഷഭിന് രണ്ട് ആഴ്ചയ്ക്കുള്ളിൽ ആശുപത്രി വിടാനാകുമെന്നാണ് കരുതുന്നത്. എന്നാൽ ക്രിക്കറ്റിലേക്ക് മടങ്ങി വരാൻ കുറഞ്ഞത് ആറ് മാസമെങ്കിലും വേണ്ടിവരും.
Comments