തൃണമൂൽ വക്താവ് സാകേത് ഗോഖലെ വീണ്ടും അറസ്റ്റിൽ; 1.07 കോടി രൂപ തട്ടിയെന്ന് കേസ്

ന്യൂഡൽഹി: തൃണമൂൽ കോൺഗ്രസ് വക്താവ് സാകേത് ഗോഖലെയെ അറസ്റ്റ് ചെയ്ത് എൻഫോഴ്‌സ്‌മെന്റ് ഡയറക്ടറേറ്റ്. വഞ്ചനാക്കുറ്റത്തിന് നിലവിൽ ഗുജറാത്തിലെ ജയിലിൽ കഴിയവെയാണ് സാകേത് ഗോഖലയെ ഇഡി അറസ്റ്റ് ചെയ്തിരിക്കുന്നത്. ക്രൗഡ് ഫണ്ടിംഗിലൂടെ സമാഹരിച്ച പണം ദുരുപയോഗം ചെയ്തുവെന്ന കേസിലാണ് നടപടി. ഏകദേശം 1.07 കോടി രൂപ തട്ടിയെന്നാണ് ഗോഖലയ്‌ക്കെതിരായ പരാതി.

വഞ്ചനാക്കുറ്റത്തിന് നേരത്തെ അഹമ്മദാബാദ് സൈബർ ക്രൈംബ്രാഞ്ച് ആണ് ഗോഖലെയെ അറസ്റ്റ് ചെയ്തത്. 2022 ഡിസംബർ 30ന് ഡൽഹിയിൽ വച്ചായിരുന്നു അറസ്റ്റ്. അതിന് മുമ്പ് ഡിസംബർ ആറിന് ഇയാളെ പോലീസ് അറസ്റ്റ് ചെയ്തിരുന്നു. മോർബി പാലം ദുരന്തത്തോടനുബന്ധിച്ച് പ്രധാനമന്ത്രി നരേന്ദ്രമോദി നടത്തിയ ഗുജറാത്ത് സന്ദർശനവുമായി ബന്ധപ്പെട്ട് വ്യാജ വാർത്ത പങ്കുവച്ചതിനായിരുന്നു അറസ്റ്റ്. ഇപ്പോൾ ഇഡിയുടെ നടപടി കൂടിയായതോടെ ഗോഖലെ മൂന്നാമത്തെ പ്രാവശ്യമാണ് അറസ്റ്റിലാകുന്നത്.