ന്യൂഡൽഹി: അടുത്ത മൂന്ന് വർഷത്തിനുള്ളിൽ മൂന്ന് കോടി കർഷകരെ ജൈവകൃഷിയുമായി ബന്ധിപ്പിക്കുമെന്ന് പ്രഖ്യാപിച്ച് ബിജെപി കിസാൻ മോർച്ച. പ്രധാനമന്ത്രി കിസാൻ സമ്മാൻ നിധി യോജനയുടെ 4 വർഷം പൂർത്തിയാകുന്ന ഫെബ്രുവരി 24-ന് രാജ്യത്തെ എല്ലാ ജില്ലകളിലും പരിപാടികൾ സംഘടിപ്പിക്കുമെന്നും ബിജെപി കിസാൻ മോർച്ച അറിയിച്ചു.
പ്രധാനമന്ത്രി സമ്മാൻ നിധി യോജനയുടെ ഗുണഭോക്താക്കളുമായി സംവാദവും കർഷക സമ്മേളന പരിപാടിയും സംഘടിപ്പിക്കും. ബിജെപി കിസാൻ മോർച്ചയുടെ ദേശീയ അദ്ധ്യക്ഷനും എംപിയുമായ രാജ്കുമാർചാഹറിന്റെ നേതൃത്വത്തിൽ ഇന്നലെ നടന്ന പ്രകൃതിക് ഖേതി ജാഗരൺ അഭിയാൻ ദേശീയ പരിശീലന പരിപാടിയുടെ ശിൽപ്പശാലയിലാണ് ഈ തീരുമാനം.
കർഷകർ പ്രധാനമന്ത്രി നരേന്ദ്രമോദിയുടെ ഹൃദയത്തിലും പ്രധാനമന്ത്രി കർഷകരുടെ ഹൃദയത്തിലുമാണ് കുടികൊള്ളുന്നത.് ഇതിനുകാരണം മോദി സർക്കാർ കർഷകരുടെ താൽപ്പര്യങ്ങൾക്കായി തുടർച്ചയായി പദ്ധതികൾ കൊണ്ടുവന്നതുകൊണ്ടാണെന്നും ഇന്ന് നമ്മുടെ കർഷക സഹോദരങ്ങൾ ശക്തരും സ്വയംപര്യാപ്തരുമാണെന്നും ബിജെപി കിസാൻ മോർച്ച ദേശീയ അദ്ധ്യക്ഷൻ രാജ്കുമാർ ചാഹർ പറഞ്ഞു.
ആദ്യഘട്ടത്തിൽ ഗംഗാതീരത്തിന്റെ ഇരുകരകളിലുമായി 5 കിലോമീറ്റർ പദയാത്രകളും കിസാൻ സമ്മേളനങ്ങളും രണ്ടാം ഘട്ടത്തിൽ ജനജാഗ്രതാ പ്രചാരണവും പദയാത്രകളും സംഘടിപ്പിക്കുമെന്ന് കിസാൻ മോർച്ച ദേശീയ കൺവീനർ മനോജ് യാദവ് അറിയിച്ചു. രാജ്യത്തിന്റെ മറ്റ് ഭാഗങ്ങളിൽ നദികളുടെ തീരത്ത് ജൈവകൃഷി പ്രോത്സാഹിപ്പിക്കുക. ജൈവകൃഷിക്ക് ആയിരക്കണക്കിന് തൊഴിലാളികൾക്ക് പരിശീലനം നൽകുക. സംസ്ഥാന-ജില്ലാ തലങ്ങളിൽ ജൈവകൃഷി സെമിനാറുകളും പരിശീലന പരിപാടികളും നടത്തുക തുടങ്ങിയവയാണ് മറ്റ് പരിപാടികൾ.
