ന്യൂഡൽഹി: ഉഭയകക്ഷി വ്യാപാരം വിപുലീകരിച്ച് ശ്രീലങ്കയുടെ സാമ്പത്തിക പുനരുജ്ജീവനം കാര്യക്ഷമമാക്കാൻ ശ്രീലങ്കൻ ഹൈക്കമീഷണർ മിലിന്ദ മൊറഗോഡ കേന്ദ്ര വ്യവസായ മന്ത്രി പീയുഷ് ഗോയലുമായി ചർച്ച നടത്തി. തുടർന്ന് ഉഭയകക്ഷി വ്യാപാര വാണിജ്യത്തിന്റെ വിവിധവശങ്ങളും രാജ്യത്തെ സാമ്പത്തിക സുസ്ഥിരതയും ഇരുവരും ചേർന്ന് ചർച്ച ചെയ്തു.
ഉഭയകക്ഷി വാണിജ്യത്തിന് ‘ ഇന്ത്യൻ രൂപ ‘ അടിസ്ഥാന മാദ്ധ്യമമാക്കിയതിലൂടെ ഉണ്ടായ വ്യാപാരത്തിന്റെ അനന്ത സാധ്യതകളെക്കുറിച്ചും ഇരുവരും ചർച്ച ചെയ്തു. ടെക്സ്റ്റെൽസ്,ഗാർമെൻസ് മേഖലയിൽ പരസ്പരസംയോജനത്തിന്റെ സാധ്യതകൾ ചർച്ചയിൽ പ്രതിപാദിച്ചു. സാമ്പത്തിക ആഘാതം ലഘൂകരിക്കാനായി ഇന്ത്യ നൽകിയ കാര്യക്ഷമമായ പിന്തുണയ്‌ക്ക് ഹൈക്കമീഷണർ മിലിന്ദ മൊറഗോഡ നന്ദി രേഖപ്പെടുത്തി. ശ്രീലങ്കയ്‌ക്കു വേണ്ടി അന്താരാഷ്‌ട്ര നാണ്യ നിധി ആവിഷ്‌കരിച്ച വായ്പാ പുനഃക്രമീകരണ പദ്ധതിയിൽ ആദ്യം ജാമ്യം നിന്നത് ഇന്ത്യയാണ്. ഈ നീക്കത്തിലൂടെ 2.9 ബില്യൺ യുഎസ് ഡോളറിന്റെ സഹായമാണ് അന്താരാഷ്‌ട്ര നാണ്യ നിധിയിൽ നിന്ന് പ്രതീക്ഷിക്കുന്നത് എന്നും മിലിന്ദ ചൂണ്ടിക്കാട്ടി.
നേരത്തെ ശ്രീലങ്കക്ക് സാമ്പത്തിക സുസ്ഥിരത കൈവരിയ്‌ക്കാനായി ഇന്ത്യൻ നിക്ഷേപം വർദ്ധിപ്പിക്കുമെന്ന് വിദേശകാര്യ മന്ത്രി എസ് ജയശങ്കർ പറഞ്ഞിരുന്നു.
കൂടാതെ അടിസ്ഥാന സൗകര്യങ്ങൾ, ഉർജ്ജം,ഗതാഗതം,ആരോഗ്യം,വ്യാപാരം എന്നീ വിഷയങ്ങളുമായി ബന്ധപ്പെട്ട് ചർച്ചയും ദ്വീപ് രാഷ്‌ട്ര സന്ദർശനവേളയിൽ അദ്ദേഹം നടത്തിയിരുന്നു.
Comments