ന്യൂഡൽഹി: നിരവധി പേരുടെ ജീവിതത്തിൽ ഗുണപരമായ മാറ്റങ്ങൾ വരുത്താൻ ജൽ ജീവൻ മിഷന് സാധിച്ചതിൽ സന്തോഷം പങ്കുവച്ച് പ്രധാനമന്ത്രി നരേന്ദ്രമോദി. നീരസാഗറിലെ പ്രദേശവാസികളുടെ ജീവിതത്തെ മാറ്റിമറിക്കുവാൻ ജൽ ജീവൻ പദ്ധതിക്ക് സാധിച്ചതുമായി ബന്ധപ്പെട്ട് കേന്ദ്രമന്ത്രി പ്രഹളാദ് ജോഷി പോസ്റ്റ് ചെയ്ത ട്വീറ്റിന് മറുപടിയായാണ് പ്രധാനമന്ത്രി തന്റെ സന്തോഷമറിയിച്ചത്. ധാർവാഡ് നിയമസഭാ മണ്ഡലത്തിലാണ് നീരസാഗർ ഉൾപ്പെടുന്നത്
ജൽ ജീവൻ മിഷൻ പദ്ധതിയിലൂടെ ഗ്രാമങ്ങളിൽ കുടിവെള്ളമെത്തിക്കാൻ കഴിഞ്ഞതിലൂടെ കോടിക്കണക്കിന് വരുന്ന ജനങ്ങളുടെ ജീവിതനിലവാരം മെച്ചപ്പെട്ടിരുന്നു. 2019 ഓഗസ്റ്റിലായിരുന്നു പദ്ധതി ആരംഭിച്ചത്. 2024-ഓടെ ഗ്രാമ പ്രദേശങ്ങളിലെ എല്ലാ വീടുകളിലും വ്യക്തിഗത ഗാർഹിക ടാപ്പ് കണക്ഷൻ നൽകി കുടിവെള്ളം ലഭ്യമാക്കുകയാണ് പദ്ധതിയുടെ ലക്ഷ്യം.
കേന്ദ്ര സർക്കാർ പുറത്തുവിട്ട ഔദ്യോഗിക കണക്കുകൾ പ്രകാരം 2019 ൽ 3.23 കോടി കുടുംബങ്ങൾക്ക് മാത്രമാണ് പൈപ്പ് കണക്ഷൻ ഉണ്ടായിരുന്നത്. ജൽ ജീവൻ പദ്ധതി നടപ്പിലാക്കിയതോടെ അതേവർഷം കുടിവെള്ള പൈപ്പ് കണക്ഷൻ ലഭിച്ച കുടുംബങ്ങളുടെ എണ്ണം 9.4 കോടിയായി ഉയർന്നു. 107 ജില്ലകളിലായി 1.5 ലക്ഷം ഗ്രാമങ്ങൾ പദ്ധതിയുടെ ഭാഗമായിട്ടുണ്ട്. ഇതിനുപുറമേ 17.39 ലക്ഷം സ്‌കൂളുകൾക്കും അങ്കണവാടി കേന്ദ്രങ്ങൾക്കും കുടിവെള്ള പദ്ധതിയുടെ പ്രയോജനം ലഭിച്ചു.
ഗ്രാമങ്ങളിലെ കുടിവെള്ള വിതരണ നടത്തിപ്പിന് വേണ്ടി 4.82 ലക്ഷം ജലകമ്മറ്റികൾ രൂപീകരിച്ചിട്ടുണ്ട്. ഇതിന്റെ ഭാഗമായി 9.69 ലക്ഷം സ്ത്രീകൾക്ക് ജലത്തിന്റെ ഗുണനിലവാരം പരിശോധിക്കുന്നതിനായി പരിശീലനം നൽകിയിട്ടുണ്ട്. നാല് ലക്ഷത്തിലധികം ഗ്രാമങ്ങളിൽ ജലത്തിന്റെ ഗുണനിലവാരം പരിശോധിക്കാനുള്ള സംവിധാനവും ലഭ്യമാണ്.
