മുംബൈ : ബോളിവുഡ് സിനിമാപ്രേക്ഷകര്‍ ഏറെ ആഘോഷിച്ച വിവാഹമായിരുന്നു കിയാര- സിദ്ധാര്‍ത്ഥ് താരങ്ങളുടേത്. ഇപ്പോഴിതാ സമൂഹമാദ്ധ്യമങ്ങളിൽ ചർച്ചയാകുന്നത് കിയാര അദ്വാനിയുടെയും അമ്മ ജനീവിന്റെയും ചിത്രങ്ങളാണ്. അമ്മയുടെ ജന്മദിനത്തിൽ നടി ആശംസകൾ നേർന്ന് ഇൻസ്റ്റാഗ്രാമിൽ പങ്കുവെച്ച പോസ്റ്റാണ് ചർച്ചയ്‌ക്ക് കാരണം.
“എന്റെ സ്നേഹമുള്ള, കരുതലുള്ള, പ്രാർത്ഥിക്കുന്ന എന്റെ അമ്മയ്‌ക്ക് ജന്മദിനാശംസകൾ….നിങ്ങളുടെ മകളാകാൻ ഞാൻ അനുഗ്രഹിക്കപ്പെട്ടവളാണ്.” എന്നാണ് കിയാര ഇൻസ്റ്റാഗ്രാമിൽ കുറിച്ചത്. കുറിപ്പിനൊപ്പം സിദ്ധാർത്ഥ് മൽഹോത്രയുടെയും കിയാരയുടെയും വിവാഹത്തിൽ അമ്മയ്‌ക്കൊപ്പം എടുത്ത ചിത്രങ്ങളും ആരാധകർക്കായി നടി പങ്കുവെച്ചിട്ടുണ്ട്.
ഹൽദി, സംഗീത് , വിവാഹ ചടങ്ങുകളിൽ എടുത്ത അമ്മ-മകൾ ജോഡിയുടെ മനോഹരമായ ചിത്രങ്ങളാണ് പുറത്ത് വന്നിരിക്കുന്നത്. ആദ്യ ചിത്രത്തില്‍ കിയാര തന്റെ അമ്മയെ പുറകിൽ നിന്ന് കെട്ടിപിടിക്കുകയും അമ്മ ജനീവ് കവിളിൽ ചുംബിക്കുന്നതും കാണാം, മറ്റൊരു ചിത്രത്തിൽ വിവാഹദിനത്തിൽ ജനീവ് പിങ്ക് നിറത്തിലുള്ള ലെഹങ്കയിൽ കിയാരയോടൊപ്പം നിൽക്കുന്നും കാണാം. അവസാന ചിത്രത്തിൽ ഹൽദി ചടങ്ങിൽ കിയാരയ്‌ക്കും സിദ്ധാർത്ഥിനുമൊപ്പം അദ്വാനി കുടുംബം നിൽക്കുന്നും കാണാം.
ചിത്രങ്ങൾ വൈറലായതോടെ നിരവധി ആരാധകർ കമന്റുകളുമായി എത്തി. അമ്മ വളരെ സുന്ദരിയാണെന്നും, കിയാര അമ്മയുടെ കാർബൺ കോപ്പിയാണെന്നാണ് ആരാധകർ പറയുന്നത്. വിവാഹത്തിന് കുടുംബസംഗങ്ങൾക്കായി വസ്ത്രം ഡിസൈൻ ചെയ്ത ഡിസൈനർ മനീഷ് മൽഹോത്രയും അമ്മയ്‌ക്ക് ആശംസകൾ നേർന്നിട്ടുണ്ട്.
ഫെബ്രുവരി 7 ന് രാജസ്ഥാനിലെ സൂര്യഗഡ് കൊട്ടാരത്തിൽ വെച്ചാണ് സിദ്ധാർത്ഥും കിയാരയും വിവാഹിതരായത്. അടുത്ത സുഹൃത്തുക്കൾക്കായി ഡൽഹിയിലും പിന്നീട് ഫെബ്രുവരി 12ന് മുംബൈയിലും റിസപ്ഷൻ സംഘടിപ്പിച്ചു.
2021-ൽ പുറത്തിറങ്ങിയ ‘ഷേർഷാ’ എന്ന സിനിമയുടെ ചിത്രീകരണത്തിനിടെയാണ് ഇരുവരും പ്രണയത്തിലായത്.
Comments