തിരുവനന്തപുരം: നിയമസഭയിൽ ബഹളമുണ്ടാക്കിയ ഭരണപക്ഷത്തെ വിമർശിച്ച് സ്പീക്കർ എ.എൻ ഷംസീർ. പ്രതിപക്ഷ നേതാവ് വി.ഡി സതീശന്റെ പ്രസംഗത്തിനിടെയാണ് ഭരണപക്ഷ എംഎൽഎമാർ ബഹളമുണ്ടാക്കിയത്. പിന്നാലെ, ഷംസീർ വിമർശനവുമായി എത്തി. മുഖ്യമന്ത്രി പ്രസംഗിച്ചപ്പോൾ പ്രതിപക്ഷം മിണ്ടാതിരുന്നു എന്ന് ചൂണ്ടിക്കാണിച്ചു കൊണ്ടാണ് ഷംസീറിന്റെ പ്രതികരണം.
‘ഒന്ന് പ്ലീസ്…മിണ്ടാതിരിക്കണം. ബഹുമാനപ്പെട്ട മുഖ്യമന്ത്രി സംസാരിക്കുമ്പോൾ അവര് അനങ്ങിയിട്ടില്ല. അതുകൊണ്ട് ഭരണപക്ഷം മര്യാ.. നിശബ്ദമായിരിക്കണം പ്ലീസ്’ എന്നാണ് ഷംസീർ വിമർശിച്ചത്. മുഖ്യമന്ത്രിയുടെ വിമർശനങ്ങൾക്ക് പ്രതിപക്ഷ നേതാവ് മറുപടി നൽകുമ്പോഴായിരുന്നു സഭയിൽ ബഹളം ഉണ്ടായത്.
അതേസമയം, മുഖ്യമന്ത്രിയുടെ സുരക്ഷയുമായി ബന്ധപ്പെട്ട് പ്രതിപക്ഷം ഉയർത്തിയ വിമർശനത്തിൽ പിണറായി വിജയൻ പ്രതികരിച്ചു. മുഖ്യമന്ത്രി വീട്ടിലിരിക്കേണ്ടി വരുമെന്ന പ്രതിപക്ഷ നേതാവിന്റെ പരാമർശം ഉന്നയിച്ചായിരുന്നു പിണറായി മറുപടി നൽകിയത്. ‘പഴയ വിജയനാണെങ്കിൽ ഞാൻ അപ്പോഴേ മറുപടി പറഞ്ഞിട്ടുണ്ടാകും. ആ മറുപടിയല്ല ഇപ്പോൾ പറയേണ്ടത്. മുഖ്യമന്ത്രി കസേരയിൽ ഇരിക്കുന്ന ആൾക്കെതിരെ സ്വാഭാവിക പ്രതിഷേധം ഉണ്ടാകും. മുഖ്യമന്ത്രിക്കെതിരെ പരാമർശങ്ങൾ പറയേണ്ടി വരും. മുഖ്യമന്ത്രി കസേരയിൽ അല്ലെങ്കിൽ തന്റെ മറുപടി മറ്റൊന്നാകും. അത് സുധാകരനോട് ചോദിച്ചാ മതി’ എന്നായിരുന്നു പിണറായി വിജയന്റെ മറുപടി.
