ഹൈദരാബാദ് : തെലങ്കാനയിൽ ബാഡ്മിന്റൺ കളിക്കുന്നതിനിടെ യുവാവിന് ദാരുണാന്ത്യം. ഹൈദരാബാദ് ലാലപെറ്റ് ജയശങ്കർ ഇൻഡോർ സ്റ്റേഡിയത്തിൽ കഴിഞ്ഞ ദിവസമാണ് സംഭവം. ശ്യം യാദവ് എന്ന യുവാവാണ് മരണപ്പെട്ടത്. ബാഡ്മിന്റൺ കളിക്കുന്നതിനിടെ അബോധാവസ്ഥയിൽ കുഴഞ്ഞ് വീഴുകയും തുടർന്ന് ശ്വാസതടസ്സം മൂലം മരിക്കുകയുമായിരുന്നു.
പെട്ടെന്നുണ്ടായ ഹൃദയാഘാതത്തെ തുടർന്നാണ് മരണം സംഭവിച്ചതെന്നാണ് പ്രാഥമിക റിപ്പോർട്ട്. സ്ഥിരമായി ബാഡ്മിന്റൺ കളിക്കുന്ന വ്യക്തിയാണ് ശ്യം യാദവ്. എല്ലാ ദിവസത്തെയും പോലെയാണ് കഴിഞ്ഞ ദിവസവും യാദവ് സ്റ്റേഡിയത്തിൽ എത്തിയത്. എന്നാൽ പെട്ടെന്നുണ്ടായ ഹൃദയാഘാതവും കടുത്ത ശ്വാസതടസ്സവും മൂലമാണ് മരണപ്പെട്ടതെന്ന് ഗാന്ധി ആശുപത്രി അധികൃതർ അറിയിച്ചു.
ഹൈദരബാദിൽ പെട്ടെന്നുണ്ടാകുന്ന ഹൃദയാഘാതത്തെ തുടർന്നുള്ള മരണങ്ങൾ മുൻപും റിപ്പോർട്ട് ചെയ്തിട്ടുണ്ട്. ദിവസങ്ങൾക്ക് മുൻപ് തെലങ്കാനയിലെ സെക്കന്ദരാബാദിൽ ജിമ്മിൽ വ്യായാമം ചെയ്യുന്നതിനിടെ 24-കാരനായ പോലീസ് ഉദ്യോഗസ്ഥൻ ഹൃദയാഘാതം മൂലം മരണപ്പെട്ടിരുന്നു.
Comments