ട്രാൻസ്‌ഫോർമറുകൾക്ക് സമീപം അകലം പാലിച്ച് പൊങ്കാലയിടണം; ആറ്റുകാൽ പൊങ്കാലയ്‌ക്ക് സുരക്ഷാനിർദേശങ്ങളുമായി കെഎസ്ഇബി

തിരുവനന്തപുരം: ട്രാൻസ്‌ഫോർമറുകൾക്ക് സമീപം സുരക്ഷിത അകലം പാലിച്ച് മാത്രമേ പൊങ്കാലയിടാവൂവെന്ന് നിർദേശിച്ച് കെഎസ്ഇബി. ട്രാൻസ്‌ഫോർമർ സ്റ്റേഷന്റെ ചുറ്റുവേലിക്ക് സമീപം വിശ്രമിക്കുകയോ സാധന സാമഗ്രികൾ സൂക്ഷിക്കുകയോ ചെയ്യരുതെന്നും വൈദ്യുതി പോസ്റ്റിന് താഴെ പൊങ്കാലയിടാതിരിക്കാൻ ശ്രദ്ധിക്കേണ്ടതാണെന്നും കെഎസ്ഇബി അറിയിച്ചു.

‘ട്രാൻസ്‌ഫോമറുകൾ, വൈദ്യുതി പോസ്റ്റുകൾ എന്നിവയുടെ കീഴിൽ ചപ്പുചവറുകൾ കൂട്ടിയിടരുത്. ഗുണനിലവാരമുള്ള വയറുകൾ, സ്വിച്ച് ബോർഡുകൾ എന്നിവ ഉപയോഗിച്ചു മാത്രമേ ശബ്ദം, വെളിച്ചം എന്നീ സംവിധാനങ്ങൾ പ്രവർത്തിപ്പിക്കാവൂ. വൈദ്യുതി ദീപാലങ്കാരങ്ങൾ അംഗീകൃത കോൺട്രാക്ടർമാരെ മാത്രം ഉപയോഗിച്ച് നിർവഹിക്കാവൂ.ലൈറ്റുകൾ, ദീപാലങ്കാരങ്ങൾ തുടങ്ങിയവ പൊതുജനങ്ങൾക്ക് കയ്യെത്താത്ത ഉയരത്തിൽ സ്ഥാപിക്കുക. ഗേറ്റുകൾ, ഇരുമ്പ് തൂണുകൾ, ഗ്രില്ലുകൾ, ലോഹ ബോർഡുകൾ എന്നിവയിൽ കൂടി വൈദ്യുതി ദീപാലങ്കാരങ്ങൾ നടത്തുവാൻ പാടില്ല. വൈദ്യുതി പോസ്റ്റുകളിലോ അനുബന്ധ ഉപകരണങ്ങളിലോ ബാനർ, പരസ്യബോർഡുകൾ തുടങ്ങിയവ സ്ഥാപിക്കരുത്’- തുടങ്ങിയ നിർദേശങ്ങളും കെഎസ്ഇബി പുറത്തുവിട്ടു.

കൂടാതെ ഇൻസുലേഷൻ നഷ്ടപ്പെട്ടതോ, ദ്രവിച്ചതോ പഴകിയതോ കൂട്ടിയോജിപ്പിച്ചതോ ആയ വയറുകൾ ഉപയോഗിക്കരുതെന്നും വൈദ്യുതി പോസ്റ്റുകളിൽ അലങ്കാര വസ്തുക്കൾ സ്ഥാപിക്കാൻ പാടില്ലെന്നും പൊങ്കാല ഇടുന്നവരും പൊങ്കാല മഹോത്സവത്തിൽ പങ്കാളികളാവുന്നവരും സുരക്ഷാ മുൻകരുതലുകൾ കർശനമായി പാലിക്കണമെന്നും കെഎസ്ഇബി മുന്നറിയിപ്പ് നൽകി.