മലയാളികളുടെ മണിനാദം ലോകത്തോട് വിടപറഞ്ഞിട്ട് ഇന്നേക്ക് ഏഴ് വർഷം. കലാഭവൻ മണിയെന്ന വ്യക്തി മലയാളികളുടെ മനസ്സിൽ ഇടം നേടിയത് അഭിനയമികവ് കൊണ്ടോ ഗാനാലാപനം കൊണ്ടോ മാത്രമായിരുന്നില്ല. ജീവിതത്തിൽ നാട്യമോ കാപട്യമോ ഇല്ലാത്ത മനുഷ്യൻ, സഹജീവികളോട് കാരുണ്യമുള്ളവൻ, സാധാരണക്കാരൻ, ഓട്ടോക്കാരൻ എന്നിങ്ങനെ എണ്ണിയാൽ തീരാത്തത്ര വർണ്ണനകളാണ് അദ്ദേഹത്തെ കുറിച്ചോർക്കുമ്പോൾ മലയാളികളുടെ മനസ്സിൽ നിറയുക. നിരവധി പ്രമുഖ താരങ്ങളും വ്യക്തിത്വങ്ങളുമാണ് മണിയുടെ ഓർമ്മകൾ പങ്കുവെച്ചിരിക്കുന്നത്. എത്ര പതിറ്റാണ്ടുകൾ പിന്നിട്ടാലും മണിയുടെ പുഞ്ചിരിക്കുന്ന മുഖവും മണിനാദവും മലയാളികളുടെ മനസിൽ തിങ്ങി നിൽക്കും. മണിയെകുറിച്ചുള്ള ഓർമ്മകൾ പങ്കുവെച്ചിരിക്കുകയാണ് സംവിധായകൻ വിനയൻ.
സംവിധായകൻ വിനയന്റെ വാക്കുകൾ…..
‘മണി യാത്രയായിട്ട് ഏഴു വർഷം…സാധാരണക്കാരനിൽ സാധാരണക്കാരനായ ആ അതുല്യകലാകാരന്റെ അകാലത്തിലുള്ള വേർപാട് ഓർക്കുമ്പോൾ ഇന്നും മനസ്സിൽ വേദനയുടെ കനലെരിയുന്നു..ഏറെ ദാരിദ്ര്യവും അതിലേറെ അവഗണനയും ഒക്കെ സഹിച്ച് തന്റേതായ അസാധാരണകഴിവുകൾ കൊണ്ടു മാത്രം മലയാളസിനിമയിലും മലയാളികളുടെ മനസ്സിലും ഇടം നേടാൻ കഴിഞ്ഞ കലാഭവൻ മണിക്ക് ഒത്തിരി സ്വപ്നങ്ങൾ ബാക്കിയുള്ളപ്പോഴാണ് ജീവിതം കൈവിട്ടു പോയത്… ഇതിനെയാണല്ലോ വിധി എന്നു നമ്മൾ പറയുന്നത്… ഇനിയൊരു ജന്മമുണ്ടങ്കിൽ ഈ സ്‌നേഹഭൂമിയിൽ ഇനിയും മണി ജനിക്കട്ടെ…. ആദരാഞ്ജലികൾ…’,
ചാലക്കൂടി നഗരത്തിലെ ഓട്ടോ ഡ്രൈവറിൽ നിന്നും സിനിമയിലേക്ക് പകർന്നാട്ടം നടത്തിയ അതുല്യ പ്രതിഭയാണ് മണി. എന്നാൽ അദ്ദേഹത്തിന്റെ അപ്രതീക്ഷിത വിയോഗം കേരളക്കരയാകെ കണ്ണീരിലാഴ്‌ത്തി. രാമൻ-അമ്മിണി ദമ്പതികളുടെ ഏഴ് മക്കളിൽ ആറാമനാണ് മണി. ഇല്ലായമകളും ദുരിതവും കണ്ടറിഞ്ഞ് വളർന്ന കലാകാരൻ. രണ്ട് ദശാബ്ദക്കാലം ആരാധകരെ ചിരിപ്പിച്ചും ചിന്തിപ്പിച്ചും കരയിപ്പിച്ചും അരങ്ങു തകർത്ത മണിയുടെ ഓർമ്മകൾ ഒളിമങ്ങാതെ ഇനിയും നിലനിൽക്കും.
