20 കുരങ്ങന്മാർ ചേർന്ന് വീട്ടിൽ കയറി ആക്രമിച്ചു; 70-കാരിക്ക് ദാരുണാന്ത്യം

ഹൈദരാബാദ്: കുരങ്ങന്മാരുടെ ആക്രമണത്തിൽ വയോധികയ്‌ക്ക് ദാരുണാന്ത്യം. കഴിഞ്ഞ വെള്ളിയാഴ്ച തെലങ്കാനയിലെ കാമറെഡ്ഡി ജില്ലയിലായിരുന്നു സംഭവം. രാമറെഡ്ഡി സ്വദേശിനിയായ ഛത്തരബോയ്‌ന നർസവയാണ് മരിച്ചത്.

ഇരുപതോളം കുരങ്ങൻമാർ ചേർന്ന് 70-കാരിയെ ആക്രമിക്കുകയായിരുന്നു. വീട്ടിൽ ഗാർഹികോപകരണങ്ങൾ വൃത്തിയാക്കുന്നതിനിടെയായിരുന്നു സംഭവം. നർസവയുടെ നെഞ്ചിലും മുതുകിലും കൈകാലുകളിലുമാണ് ആക്രമണത്തിൽ പരിക്കേറ്റത്.

ഇതേസമയം വയോധിക വീട്ടിൽ ഒറ്റയ്‌ക്കായിരുന്നു. ഏക മകൾ ഒരു വിവാഹ ചടങ്ങിൽ പങ്കെടുക്കാൻ പുറത്തുപോയിരിക്കവെയാണ് ആക്രമണമുണ്ടായത്. ഗുരുതരമായി പരിക്കേറ്റ നർസവ ചികിത്സയിലിരിക്കെ പിറ്റേന്ന് അന്തരിച്ചു. മേഖലയിൽ കുരങ്ങന്മാരുടെ ആക്രമണം പതിവാണെന്ന് പ്രദേശവാസികൾ പറയുന്നു.