ചൈനീസ് ചാരബലൂൺ ഇന്ത്യയിലേക്കും എത്താൻ സാധ്യത; നേരിടാൻ കർമ പദ്ധതിയുമായി പ്രതിരോധ സേന

ന്യൂഡൽഹി: ചൈനീസ് ചാരബലൂൺ ഇന്ത്യൻ അതിർത്തി കടന്നെത്താനുള്ള സാധ്യത ഏറെയായതിനാൽ പുതിയ കർമ്മ പദ്ധതിക്ക് അന്തിമരൂപം നൽകാനൊരുങ്ങി പ്രതിരോധ സേന. വിഷയത്തിൽ ചർച്ച നടക്കുകയാണെന്നും വിശദാംശങ്ങൾ പഠിച്ച് വരികയാണെന്നും ഉന്നത സർക്കാർ വൃത്തങ്ങൾ അറിയിച്ചു.

ആക്ഷൻ പ്ലാനിനെ കുറിച്ചുള്ള ചർച്ചകൾ പ്രതിരോധ സേനയിൽ നടക്കുന്നുണ്ട്. ചാര ബലൂണുകൾക്ക് ഒരു സ്റ്റിയറിംഗ് മെക്കാനിസം ഉണ്ടായിരിക്കാൻ സാദ്ധ്യതയുള്ളതിനാൽ ഉടമയുടെ താൽപ്പര്യമനുസരിച്ച് ആവശ്യമായ സ്ഥലത്ത് സ്ഥിരപ്പെടുത്തി അവയെ നിയന്ത്രിക്കാൻ സാധിക്കും. അതിനാൽ അത്തരമൊരു രീതിയിലെ പദ്ധതിയാണ് പ്രതിരോധ സേന രൂപീകരിക്കുന്നതെന്നും ദേശീയ മാദ്ധ്യമങ്ങൾ റിപ്പോർട്ട് ചെയ്തു.

കഴിഞ്ഞ മാസം യുഎസ് അതിർത്തിയിൽ ചാരബലൂണിനെ കണ്ടെത്തിയത് വൻ വിവാദങ്ങൾക്കാണ് വഴിവെച്ചത്. ദിവസങ്ങൾക്ക് ശേഷം ബലൂൺ യു എസ് യുദ്ധവിമാനങ്ങൾ ഉപയോഗിച്ച് വെടിവെച്ചു വീഴ്‌ത്തുകയായിരുന്നു. യുദ്ധവിമാനങ്ങളിലെ മിസൈൽ ഉപയോഗിച്ചാണ് ബലൂൺ വെടിവെച്ചിട്ടത്. കാലാവസ്ഥാ നിരീക്ഷണത്തിനുള്ള ബലൂൺ ഗതിമാറി അമേരിക്കയിൽ എത്തിയതാണെന്നായിരുന്നു ചൈനയുടെ വിശദീകരണം.