ദിസ്പൂർ : അസമിലെ കർബി ആംഗ്ലോംഗ് ജില്ലയിൽ മയക്കുമരുന്ന് കടത്തുകാരൻ പിടിയിൽ. പോലീസും സിആർപിഎഫും നടത്തിയ സംയുക്ത ഓപ്പറേഷനിലാണ് മയക്കുമരുന്ന് കടത്തുകാരനെ പിടികൂടിയത്. 20 കോടി രൂപ വിലമതിക്കുന്ന 5 കിലോ ഹെറോയിൻ പിടിച്ചെടുത്തു.
സേനയ്‌ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ അസം-നാഗാലാൻഡ് അതിർത്തിയിൽ നടത്തിയ പരിശോധനയെ തുടർന്നാണ് വാഹനത്തിൽ നിന്നും ഹെറോയിൻ കണ്ടെടുക്കുന്നത്. വാഹനത്തിന്റെ മുകൾ ഭാഗത്ത് രഹസ്യ അറ ഉണ്ടാക്കിയതിന് ശേഷം ഇതിൽ മയക്കുമരുന്ന് സൂക്ഷിക്കുകയായിരുന്നുവെന്ന് ഉദ്യോഗസ്ഥർ അറിയിച്ചു.
അസം മിസോറാം അതിർത്തിയിലെ കരിംഗഞ്ച് ജില്ലയിൽ സമാനരീതിയിൽ വാഹനത്തിൽ നിന്ന് 1.300 കിലോ ഹെറോയിൻ കണ്ടെടുത്തിരുന്നു. സംഭവത്തിൽ മൂന്ന് പേരെ അറസ്റ്റ് ചെയ്യുകയും ചെയ്തതായി ഉദ്യോഗസ്ഥർ അറിയിച്ചു. എൻഡിപിഎസ് ആക്ട് പ്രകാരമാണ് ഇവർക്കെതിരെ കേസെടുത്തിരിക്കുന്നത്.
Comments